బాబు అడుగులు జాడల్లో లోకేష్

Posted: 09/11/2015 01:00 PM IST

Nara lokesh following nara chandrababu naidu

తండ్రి బాటలోనే పయనిస్తున్నారు టీడీపీ యువనేత, కార్యకర్తల సంక్షేమ నిధి కన్వీనర్ నారా లోకేష్. సీఎం చంద్రబాబునాయుడు వారంలో ఏడు రోజులు ఏపీలోనే ఉండాలని నిర్ణయించుకుని ఇప్పటికే అక్కడికి మకాం మార్చారు. ఇప్పుడు ఆయన తనయుడు లోకేష్ కూడా..నెలలో 15 రోజుల పాటు ఏపీలోనే ఉండేందుకు సిద్ధమవుతున్నారు. లోకేష్ కోసం గుంటూరులో పార్టీ కార్యాలయాన్ని సకల హంగులతో రెడీ చేస్తున్నాయి పార్టీ శ్రేణులు. ఆంధ్రప్రదేశ్ అభివృద్ధిని ఛాలెంజ్ గా తీసుకున్న సీఎం చంద్రబాబునాయుడు..ఉమ్మడి రాజధాని హైదరాబాద్ ను వదిలిపెట్టి వారంలో 7 రోజులు ఏపీలోనే ఉండాలని నిర్ణయించుకున్న సంగతి తెలిసిందే. ఇప్పటికే అందుకోసం ఏర్పాట్లు కూడా చేసుకున్నారు. తండ్రి అడుగుజాడల్లోనే అడుగు వేస్తున్న లోకేశ్.. ఈ నేపథ్యంలోనే గుంటూరుకు తరలుతున్నారు. పార్టీని సంస్థాగతంగా బలపర్చేందుకు.. నెలలో 15 రోజులు ఏపీలోనే ఉండేందుకు లోకేష్ ఏర్పాట్లు చేసుకుంటున్నారు. ఇందులో భాగంగానే గుంటూరు జిల్లా కేంద్రంలోని ఎన్టీఆర్ భవన్ ను తెలుగుదేశం పార్టీ రాష్ట్ర తాత్కాలిక కార్యాలయంగా మార్చేందుకు శరవేగంగా ఏర్పాట్లు జరుగుతున్నాయి. ఇకపై లోకేష్ అక్కడి నుంచే పార్టీ కార్యక్రమాలపై సమీక్షలు నిర్వహించనున్నారు.

మరోవైపు ఇన్ని రోజులు పార్టీకి సంబంధించిన..ప్రతి చిన్న విషయానికి హైదరాబాద్ కు తరలివెళ్లాల్సి వచ్చేది. ఇకపై పార్టీ అధినాయకత్వం తమకు అందుబాటులో ఉంటుందని తెలిసి కార్యకర్తలు సంతోషం వ్యక్తం చేస్తున్నారు. ఇప్పటికే రాజధాని ప్రాంతంలోని లింగమనేని గెస్ట్ హౌస్ లో సీఎం చంద్రబాబునాయుడు గృహ ప్రవేశం చేశారు. ఈ నేపథ్యంలోనే లోకేష్ కూడా ఈ నెల చివరి నుంచి గుంటూరు పార్టీ కార్యాలయంలో కార్యకర్తలకు అందుబాటులో ఉండనున్నారు. మొత్తానికి పార్టీ అధినాయకత్వం ఒక్కొక్కరుగా రాజధాని ప్రాంతానికి తరలివస్తుండటంతో..ఆంధ్రప్రదేశ్ టీడీపీ శ్రేణుల్లో కొత్త ఉత్సాహం కనిపిస్తుంది. పార్టీ కార్యకలాపాలను మరింత ముమ్మరం చేసేందుకు రెడీ అవుతున్నారు.