ప్రియుడితో లేచిపోడానికి వివాహిత ‘కిడ్నాప్’ ప్లాన్

Posted: 07/13/2015 05:57 PM IST

Hyderabad housewife radhika kidnap mystery revealed with love story

హైదరాబాద్ నగరంలో సంచలనం సృష్టించిన ‘వివాహిత’ కిడ్నాప్ కేసు మరో కొత్త మలుపు తిరిగింది. సోషల్ మీడియా ద్వారా పరిచయమైన వ్యక్తితో పారిపోవాలని భావించిన ఆమె.. తన ప్రియుడితో కలిసి కిడ్నాప్ కథ అల్లినట్లు పోలీస్ విచారణలో వెల్లడైంది. దీంతో ఈ కిడ్నాప్ కథను అల్లిన ఆ వివాహిత భర్తతోపాటు పోలీసులు ఒక్కసారిగా అవాక్కయ్యారు.

పూర్తి వివరాల్లోకి వెళ్లే.. హైదరాబాద్ లోని రాజేంద్రనగర్కు చెందిన రాధిక అనే వివాహిత కొన్నిరోజుల క్రితం కిడ్నాప్ కు గురయ్యింది. బీహార్ కు చెందిన రిజ్వాల్ అనే ఓ వ్యక్తి ఆమెను కిడ్నాప్ చేసి ఒడిశా మీదుగా కోల్ కతా తరలించాడు. అక్కడికి వెళ్లిన అనంతరం ఆమెను విడిచిపెట్టాల్సంటే రూ.3 లక్షలు ఇవ్వాలంటూ బాధితురాలి భర్తకు వాట్సాప్ ద్వారా డిమాండ్ చేశాడు. అంతేకాదు.. ఆమెను కొట్టిన దృశ్యాల్ని సైతం భర్తకు పంపించాడు. ఒకవేళ డబ్బు ఇవ్వకపోతే ఆమెను ముంబైలోని ‘రెడ్ లైట్’ ఏరియాలో అమ్మేస్తానని.. బెదిరించాడు కూడా! దీంతో ఆ బాధితురాలి భర్త సైబరాబాద్ పోలీసులను ఆశ్రయించాడు. అతని ఫిర్యాదు మేరకు పోలీసులు రంగంలోకి దిగి.. వివిధ కోణాల్లో దర్యాప్తు చేసి.. చాకచక్యంగా ఆ కిడ్నాపర్ ను పట్టుకుని.. అతడి చెరనుంచి రాధికను విడిపించారు. ఈ కిడ్నాప్ వెనుక అసలు కథేంటోనని పోలీసులు విచారించగా.. అందరిని షాక్ కు గురయ్యేలా చేసే నిజాలు వెలుగులోకి వచ్చాయి.

ఈ కేసు వెనుక దాగిన విషయం ఏమిటంటే.. వివాహిత రాధికకు, ఆమె భర్తతో కొన్ని విభేదాలున్నాయి. వారి మధ్య తరచూ గొడవలు జరుగుతూ వుండేవి. ఇదే సమయంలో 2011లో ఆమెకు రిజ్వాల్ అనే వ్యక్తితో సోషల్ మాధ్యమం ద్వారా పరిచయం అయ్యాడు. వారి మధ్య ఆ పరిచయం ప్రేమకు దారితీసింది. చివరికి ఇద్దరూ పెళ్లి చేసుకోవాలని భావించారు. అందుకు ఓ పథకం పన్నారు. ముందుగా ఇంటినుంచి పారిపోయిన వారిద్దరూ.. కిడ్నాప్ నాటకానికి తెర తీశారు. ఎందుకంటే.. వారి దగ్గర డబ్బులు లేకపోవడంతో.. భర్తను బెదిరించి డబ్బు సంపాదించాలని భావించారు. ఆ ప్లాన్ ప్రకారమే రాధికను చిత్రహింసలు చేసినట్లుగా డమ్మీ గాయాలతో రిజ్వాల్ ఆమె భర్తకు వాట్పాప్ కు ఫోటో పంపాడు. ఈ కిడ్నాప్ నాటకంలో భాగంగా వీరిద్దరూ కోల్ కతాకు పారిపోయారు. పోలీసులు చాకచక్యంగా వ్యవహరించటంతో అసలు గుట్టు రట్టయ్యింది.