చంద్రబాబు ఓ శాడిస్టు..!

Posted: 07/12/2015 11:27 AM IST

కేసీఆర్ చేస్తున్న కృషిని చూసి ఓర్వలేకనే ఎపీ సీఎం చంద్రబాబు ఓ ఉన్నాది.. శాడిస్టులా వ్యవహరిస్తున్నారని టీజీవో వ్యవస్థాపక అధ్యక్షుడు, ఎమ్మెల్యే వీ శ్రీనివాస్‌గౌడ్ విమర్శించారు. శనివారం సచివాలయంలోని మీడియా పాయింట్‌లో ఆయన మాట్లాడుతూ సెక్షన్- 8పై చంద్రబాబు కేంద్రానికి లేఖ రాయడం దారుణమని అన్నారు. సీఎంగా ఎన్నో ఏండ్ల అనుభవమున్న చంద్రబాబుకు చట్టాలు తెలియకపోవడం బాధాకరమని ఎద్దేవా చేశారు. సెక్షన్-8ని అమలు చేయాలని లేఖ రాసి తన నిజస్వరూపాన్ని బయటపెట్టుకున్నారిని అన్నారు. హైదరాబాద్‌లో అల్లకల్లోలం జరిగి ఆస్తుల నష్టం జరిగినప్పుడు మాత్రమే సెక్షన్-8 అమలు చేయాలని విభజన చట్టంలోని 3, 4 క్లాజ్‌లో స్పష్టంగా పేర్కొన్నారనే అంశాన్ని గుర్తు చేశారు. ఏపీలో మహిళా తహసీల్దార్‌పై దాడి జరిగిందని, అలాంటి ప్రాంతంలో కఠిన చట్టాలు అమలుచేయాలన్నారు. ప్రశాంతంగా ఉన్న హైదరాబాద్‌లో సెక్షన్ 8 అమలు చేయాల్సిన అవసరం లేదన్నారు. సెక్షన్-8 అమలు చేయాలని డిమాండ్ చేస్తున్న చంద్రబాబు, అతని తొత్తులపై హైదరాబాద్‌లో ఉన్న సీమాంధ్ర ప్రజలే తిరుగబడుతారని అన్నారు.

ఏపీ ప్రజల ఆగ్రహానికి గురికాకముందే తప్పును సరిదిద్దుకోవాలని సూచించారు. మహబూబ్‌నగర్ జిల్లాను 9 ఏండ్లు దత్తత తీసుకుని ఒరగబెట్టిందేమీ లేదని, ప్రస్తుతం ఆ జిల్లా ప్రజల ఉసురుపోసుకునే విధంగా పాలమూరు ఎత్తిపోత పథకాన్ని అడ్డుకునేందుకు ప్రయత్నిస్తున్నారని మండిపడ్డారు. ఈ నెల 13న మహబూబ్‌నగర్ జిల్లా ప్రజా ప్రతినిధులు, పార్టీల నేతలతో కూడిన అఖిలపక్షం గవర్నర్‌ను కలిసి చంద్రబాబుపై ఫిర్యాదు చేస్తామని తెలిపారు. అవసరమైతే ప్రధాని, రాష్ట్రపతిని కలుస్తామని అన్నారు.