సచిన్.. ఓ రెండెకరాల ఆసామీ

Posted: 06/23/2015 07:54 AM IST

Sachin tendulkar buy two acers of land in the potti sriramulu nellore dist

క్రికెట్ చరిత్రలో కలకాలం నిలిచే లెజెండరీ పేరు సచిన్ టెండూల్కర్. అయితే నిన్నటిదాకా సచిన్ క్రికెటర్ గా తెలుసు కానీ ఇప్పుడు మాత్రం క్రికెటర్ తో పాటు రెండెకరాల ఆసామీగా కూడా మారారు. క్రికెట్ ప్రపంచాన్ని ఒంటిచేత్తో ఏలిన ఆ సచిన్ టెండూల్కరే ఇప్పుడు రైతుగా మారారు. పొట్టి శ్రీరాములు నెల్లూరు జిల్లా, తడ మండలం, కాదలూరు గ్రామానికి చెందిన వి. మునికృష్ణయ్యకు సర్వే నెం.263/2 (బీ)లో రెండెకరాల పట్టాభూమి ఉండేది. దీన్ని 2006లో సచిన్‌ టెండూల్కర్‌కు అమ్మినట్లుగా వార్తలొచ్చాయి. అయితే దీన్ని ఎవరూ పెద్దగా పట్టించుకోలేదు. అయితే, తాజాగా ఆ భూమికి పట్టాదారు పాసుపుస్తకం మంజూరు చేయాలని కోరుతూ ‘మీసేవ’ద్వారా సచిన్‌ అర్జీ పెట్టుకున్నారు. దీన్ని పరిశీలించిన రెవెన్యూ అధికారులు ఆ రెండెకరాలు సచిన్‌కు చెందినదిగా నిర్ధారించారు. ఈ భూమికి పట్టా నెంబరు 456, పట్టాదారు పాసుపుస్తకం 09వై 46ఎస్‌ 005000008 నెంబర్లను కేటాయిస్తూ ఆన్‌లైన్‌ పాసుపుస్తకం జారీ అయింది. అయితే.. పట్టాదారు పాసుపుస్తకం ముద్రణకు చెన్నై పంపించినందున అక్కడినుంచి రాగానే.. సచిన్‌కు అందజేయనున్నట్లు తహసీల్దార్‌ తెలిపారు.

పార్లమెంట్ సభ్యులు ఓ గ్రామాన్ని దత్తత తీసుకోవాలని ప్రధాని నరేంద్రమోదీ ఇచ్చిన పిలుపుమేరకు పొట్టి శ్రీరాములు నెల్లూరు జిల్లాలోని కండ్రిగ గ్రామాన్ని దత్తత తీసుకున్నారు. దాంతో నిన్నటి దాకా కనీసం పేరు కూడా తెలియని కండ్రిగ గ్రామం పేరు వార్తలకెక్కింది. ప్రతి పార్లమెంటరీ సభ్యుడు దేశంలోని ఏదో ఒక గ్రామాన్ని ఆదర్శ గ్రామంగా తీర్చిదిద్దాలని కొత్తగా స్కీంను ప్రవేశపెట్టారు. దాంతో సచిన్ టెండూల్కర్ నెల్లూరు జిల్లాలోని ఓ గ్రామాన్ని దత్తత తీసుకున్నారు. అయితే క్రికెట్ రంగంలో దిగ్గజంగా పేరుగాంచిన సచిన్ తాజాగా ఆసామీగా మారారు. కాగా సచిన్‌ కుటుంబ సభ్యులకు కూడా తడ మండలంలోనే పలుచోట్ల దాదాపు 10 ఎకరాల భూములున్నాయని అధికారులంటున్నారు. అయితే వాటికి సంబంధించి పట్టాదారు పాస్‌పుస్తకాల కోసం అర్జీలు అందలేదని తెలిసింది.

*అభినవచారి*