అమెరికాకు పోటీగా చైనా నిర్మిస్తున్న ‘గాజువంతెన’

Posted: 06/19/2015 04:51 PM IST

ప్రపంచంలో ఏదైనా సరికొత్త అద్భుతాన్ని సృష్టించాలంటే అది చైనాకే సాధ్యం! అగ్రరాజ్యాలకు పోటీగా వింతైన నిర్మాణాలు చేపట్టడం దానికదే సాటి! ఇప్పుడు కూడా ప్రపంచాన్ని ఆశ్చర్యంలో ముంచెత్తే ఓ సరికొత్త నిర్మాణాన్ని చైనా చేపట్టింది. అగ్రరాజ్యం అమెరికాతో పోటీ పడుతున్న చైనా.. అన్ని విషయాల్లోనూ పైచేయి సాధించేందుకు ఈ సరికొత్త ప్రయత్నం మొదలుపెట్టింది. ఇంతకీ చైనా చేపట్టిన ఆ అద్భుతమైన నిర్మాణం ఏంటని ఆలోచిస్తున్నారా..? ఆ వివరాలు తెలియాలంటే మేటర్ లోకి వెళ్లాల్సిందే!

తాజాగా ప్రపంచంలోనే అతి పొడవైన గాజు వంతెనను నిర్మించే పనిలో చైనా పూర్తిగా నిమగ్నమై వుంది. జింయాంగ్జియాజ్ అనే ప్రాంతంలో వున్న గ్రాండ్ కాన్యన్ లో 380 మీటర్ల పొడవైన గాజు వంతెనను నిర్మిస్తున్నారు. ఈ గాజు వంతెన పై నుంచి దాదాపు 300 మీటర్ల లోతున వున్న ప్రదేశాన్ని వీక్షించవచ్చు. వచ్చే అక్టోబర్ నాటికి ఈ వంతెన నిర్మాణం పూర్తికానుందని చైనా ప్రభుత్వం వెల్లడించింది. ఈ వంతెనపై ఒకేసారి 800 మంది వెళ్లేంత దృఢంగా నిర్మించారని.. దానిపై నిస్సందేహంగా వెళ్లవచ్చునని అధికారులు వెల్లడిస్తున్నారు.

కాగా.. ఇప్పటికే తియాన్మెన్ పర్వతం వద్ద ఓ గాజు వంతెన వుంది. అయితే.. దానికంటే విశిష్టమైనదిగా నిర్మించాలనే ఉద్దేశంతో అతి పొడవైన వంతెన నిర్మించాలని నిర్ణయం తీసుకున్నట్లు చెబుతున్నారు. ప్రస్తుతం నిర్మిస్తున్న ఈ వంతెన ప్రపంచంలోనే అతి పొడవైన గాజు వంతెన అవుతుందని అంటున్నారు.