ఏపి ఎంసెట్ ఫలితాలు నేడే

Posted: 05/21/2015 07:47 AM IST

ఏపి ఎంసెట్ పరీక్ష ఫలితాలు నేడు వెల్లడికానున్నాయి. ఆంధ్రప్రదేశ్ ఎంసెట్- ఇంజినీరింగ్, వ్యవసాయ, వైద్య విద్య ప్రవేశ పరీక్షల ర్యాంకులను ప్రకటించనున్నారు. ఈ ఉదయం 11:30 గంటలకు రాష్ట్ర మానవ వనరుల అభివృద్ధిశాఖ మంత్రి గంటా శ్రీనివాసరావు, అధికారులు కాకినాడ జేఎన్‌టీయూలో ఫలితాలను విడుదల చేయనున్నారు. మార్కులు, ర్యాంకు వివరాలను రాష్ట్రంలో తొలిసారిగా విద్యార్థుల ఫోన్ లకు మెసేజ్ ల ద్వారా పంపించనున్నట్లు ఉన్నత విద్యామండలి ఛైర్మన్ వేణుగోపాల్‌రెడ్డి తెలిపారు. ర్యాంకుల విషయంలో విద్యార్థులు ఎటువంటి అపోహలు పడాల్సిన పనిలేదని ఎంసెట్ కన్వీనర్ సాయిబాబు తెలిపారు. విద్యార్థులకు తమ మార్కులకు సంబంధించిన సందేహాలుంటే వ్యక్తిగతంగా పరిశీలనకు అనుమతిస్తామన్నారు. ఇందుకోసం ఓసీ, బీసీ విద్యార్థులు రూ.5000, ఎస్సీ, ఎస్టీ విద్యార్థులు రూ.2000 చెల్లించి దరఖాస్తు చేసుకోవాల్సి ఉంటుందన్నారు. ఫలితాలను www.apeamcet.org, www.vidyavision.com, www.manabadi.com, www.99results.com, www.schools9.com ల ద్వారా తెలుసుకోవచ్చు.

*అభినవచారి*