రూపాయి ఖర్చలేకుండా 21 విమానాల్లో 13 దేశాలు తిరిగిన అమెరికన్!

Posted: 04/09/2015 07:03 PM IST

American writer scott kays travel 13 countries without efford money

అడగందే అమ్మైనా పాలివ్వదు.. అలాగే డబ్బులేనిదే ఏ వస్తువు కొనుగోలు చేయలేం.. కానీ ఓ టెంపరరీ ఉద్యోగి మాత్రం తన జేబు నుంచి ఒక్క రూపాయి తీయకుండానే రెండు నెలలకాలంలో 21 విమానాల్లో 20 వేల కిలోమీటర్ల దూరం ప్రయాణించి 13 దేశాలను ఉచితంగా సందర్శించాడు. ఏంటి..? అదెలా సాధ్యమవుతుంది..? అనేగా మీ సందేహం! ఆ వివరాలు తెలియాలంటే మేటర్ లోకి వెళ్లాల్సిందే!

మెక్సికోలో టెంపరరీ ఉద్యోగం చేస్తున్న అమెరికా జాతీయుడు-రచయిత 28 ఏళ్ల స్కాట్ కేయస్.. వివిధ విమాన సర్వీసులు ప్రవేశపెట్టిన పోటీల్లోనూ, క్రెడిట్ కార్డులపై పాయింట్లను జమ చేయడం అలవాటుంది. ఎప్పటినుంచో ఈ రెండు విభాగాల్లో పాలుపంచుకుంటూ వస్తున్న ఈ రచయితకు అవి జాక్ పాట్ ని తెచ్చిపెట్టాయి. జాక్ పాట్ అంటే లక్షల డబ్బులు పొందినట్లు కాదు.. విమాన సర్వీసులు అందించిన స్కీములు, 25 క్రిడిట్ కార్డులపై వచ్చిన పాయింట్ల నేపథ్యంలో ఫ్రీగా ప్రయాణించే అవకాశం లభించింది.

అంతే! మనోడు చకచకా తనకు కావాల్సిన సౌకర్యాలన్నింటిని తయారుచేసుకుని.. ప్రపంచదేశాలను చుట్టుముట్టడానికి బయలుదేరాడు. ఈ క్రమంలోనే ఇతగాడు ఉచితంగా 21 విమానాల్లో 20 వేల కిలోమీటర్ల దూరం ప్రయాణించి 13 దేశాలను సందర్శించినట్లు పలు ఆంగ్ల పత్రికలకు ఇచ్చిన ఇంటర్వ్యూల్లో తెలిపాడు. తన ఈ ప్రయాణంలో మెక్సికో, నికరాగువా, ట్రినిడాడ్, సెయింట్ లూయీస్, గ్రెనడా, జర్మనీ, చెక్ రిపబ్లిక్, యుక్రెయిన్, బల్గేరియా, గ్రీస్, మెసెడోనియా, లూథియాన, ఫిన్‌లాండ్ దేశాలను సందర్శించానని అతడు పేర్కొన్నాడు.

అంతేకాదు.. అన్ని దేశాల్లోనూ విమానయాన సంస్థల ద్వారా ఉచిత భోజనం, లగ్జరీ వసతి, వై-ఫై సౌకర్యాలను సద్వినియోగం చేసుకున్నానని చెప్పాడు. విమాన సర్వీసుల మధ్య విరామ సమయాన్ని బట్టి ఆయా దేశాల్లో సైట్ సీయింగ్‌కు వెళ్లానని, వాటికి కూడా తక్కువే ఖర్చుపెట్టానని, మొత్తం టూర్‌లో ఎక్కడ బయట బస చేయలేదని, విమానయాన సంస్థలు కేటాయించిన హోటళ్లలోనే గడిపానని అతగాడు చెప్పుకొచ్చాడు. కొన్ని దేశాల్లో 'స్పా' సర్వీసులను కూడా అద్భుతంగా ఆనందించానని చెప్పారు.

తన మొత్తం టూర్‌ను ప్లాన్ చేసుకోవడానికి తనకు 10-12 గంటల సమయం పట్టిందని, తన తదుపరి పర్యటనలో 42 దేశాలు సందర్శించేందుకు ప్లాన్ చేస్తున్నట్లు పేర్కొన్నాడు. ఇదిలావుండగా.. తాను చేసిన ఈ ప్రయాణానికి సంబంధించి.. 'హౌ టు ఫ్లై ఫర్ ఫ్రీ, హౌ టూ ఫైండ్ చీప్ ఫ్లైట్' అనే పేరిట పుస్తకాలు రాస్తున్నానని తెలిపాడు. వాటిలో తాను ఎలా టూర్‌లు ప్లాన్ చేసిందీ పూర్తిగా వివరిస్తానని స్పష్టం చేశాడు. త్వరలోనే వాటిని మార్కెట్‌లోకి విడుదల చేస్తున్నానని కూడా పేర్కొన్నాడు.

ఇక చివరగా.. విమాన సర్వీసుల స్కీములను, క్రెడిట్ కార్డుల ద్వారా వచ్చే పాయింట్లపై సరైన అవగాహన ఏర్పరుచుకొని వాటిని సరైన పద్ధతిలో సద్వినియోగం చేసుకుంటే ప్రపంచంలో ఎవరైనా తనలా ఉచితంగా ప్రపంచాన్ని చుట్టి రావచ్చని ప్రతిఒక్కరికి ఉచిత సలహా ఇచ్చాడు కూడా!