మాల్దీవుల మాజీ అధ్యక్షుడిపై పోలీసుల అరాచకం

Posted: 02/24/2015 04:47 PM IST

Maldives president mohamed nasheed was forcibly dragged

పోలీసులు ఎలా వ్యవహరిస్తారో ప్రత్యేకంగా చెప్పనక్కర్లేదు. తన, మన అనే భేదాభిప్రాయాలు అసలుండదని మామూలుగా అనుకుంటారు. ఇదే విషయాలను నిజం చేశారు మాల్దీవ్స్ కు చెందిన పోలీసులు. మాల్దీవుల మాజీ అధ్యక్షుడు మొహమ్మద్ నషీద్ క్రిమినల్ కోర్టు ఎదుట విలేకరులతో మాట్లాడే సమయంలో పోలీసులు కర్కశంగా ప్రవర్తించారు. జర్నలిస్టులతో మాట్లాడకుండా అతనిని ఈడ్చుకు పోయారు. 2012లో అతను అధికారంలో ఉన్న సమయంలో యాంటీ టెర్రరిజంలాను చట్టవిరుద్ధంగా ఉపయోగించారని అతని పైన ఆరోపణలు ఉన్నాయి. ఈ కేసుకు సంబంధించి లాయర్లను నియమించుకోవాలని కోర్టు అతనికి మూడు రోజుల సమయం ఇచ్చింది. ఈ నేపథ్యంలో సోమవారం కోర్టుకు తీసుకు వచ్చిన అతను జర్నలిస్టులతో మాట్లాడుతుండగా.. పోలీసులు అడ్డుకొని ఈడ్చుకెళ్లారు. అతనికి కోర్టు బెయిల్ నిరాకరించింది.

ఈ ఘటనలో అతనికి చేతి ఎముక విరిగింది. మరోవైపు, అతనిని వ్యక్తిగత లాయరును కలవనీయలేదు. విచారణ పూర్తయ్యే వరకు పోలీసు కస్టడీలోనే ఉంచాలని ఆదేశించారు. ఈ మొత్తం ఘటన పైన అంతర్జాతీయ సమాజం దిగ్భ్రాంతి వ్యక్తం చేసింది. చొక్కా పట్టి లాక్కొచ్చిన పోలీసులు.. తనకు గాయాలు అయితే కనీసం వైద్యుడి వద్దకు కూడా తీసుకు పోలేదని నషీద్ కోర్టులో జడ్జి ముందు చెప్పారు. తన చేయి విరిగిందని చెప్పాడు. అయితే, జడ్జి అతని విజ్ఞప్తిని వినిపించుకోకుండా ప్రొసీడింగ్స్ సాగించారని సమాచారం. అతను దేశం విడిచి పారిపోతాడని భావించి పోలీసులు ముందస్తుగా అరెస్టు చేసినట్లుగా తెలుస్తోంది. మాజీ నేత నషీద్ అరెస్టును మాల్దీవుల ప్రభుత్వం సమర్థించింది. కాగా, మొహమ్మద్ నషీద్‌ను పోలీసులు ఈడ్చుకెళ్లడం పైన భారత్ స్పందించింది. నషీద్ పైన పోలీసుల దాడి దురదృష్టకరమని, నిష్పక్షపాత విచారణ జరగాలని ప్రధాని మోడీ అన్నారు.
- అభినవచారి