అచ్చం సినిమాలోలాగే.. వరుడిని కాదని ‘అతిథి’ని వరించిన వధువు

Posted: 02/18/2015 12:29 PM IST

Bride indira married with wedding guest harpal singh groom gets epileptic fit up moradabad

అదొక పెళ్లి మండపం.. సగానికిపైగా పెళ్లి తంతు పూర్తయ్యింది.. బంధువులంతా ఎంతో సంతోషంగా వున్నారు.. అక్కడి వాతావరణం ఎంతో సందడిగా వుంది.. వధూవరులిద్దరూ దండలు మార్చుకోవడానికి సిద్ధమయ్యారు.. కానీ ఇంతలోనే ఓ ఘటన చోటు చేసుకుంది. అంతే! పెళ్లికొడుకుని పక్కనపెట్టేసి అతిథిగా వచ్చిన యువకుడిని వరించింది వధువు. సగటు సినిమా కథకు ఏమాత్రం తీసిపోని ఈ ఘటన యూపిలోని మొరాదాబాద్ సమీపంలో చోటు చేసుకుంది.

వివరాళ్లోకి వెళ్తే.. జుగల్ కిశోర్ (23) అనే యువకుడికి ఇందిర (23) అనే అమ్మాయితో పెళ్లి కుదిరింది. అన్ని అనుకున్నట్లుగానే పెళ్లి కార్యక్రమాలు సవ్యంగా జరిగాయి. పెళ్లి మండపం అంతా హడావుడిగా వుంది. ఈ పెళ్లి తంతులో భాగంగా దండలు మార్చుకుంటుండగా స్టోరీ మొత్తం మారిపోయింది. వధువుకు వర్తమాల వేస్తూ వరుడు కిషోర్ ఒక్కసారిగా కుప్పకూలిపోయాడు. దాంతో అందరూ ఒక్కసారిగా షాక్ కు గురయ్యారు. ఎందుకతనలా పడిపోయాడు..? అని విశ్లేషించగా.. అతగాడు మూర్ఛరోగంతో బాధపడుతున్నాడన్న విషయం వెల్లడైంది. అంతే! తీవ్ర ఆగ్రహానికి గురైన వధువు.. తనదైన రీతిలో వరుడు కుటుంబసభ్యులకు బుద్ధి చెప్పింది.

వరుడు కిషోర్ కి వున్న మూర్ఛరోగాన్నా దాచిపెట్టి వివాహం జరుపుతారా? అని వరుడి కుటుంబసభ్యులపై తీవ్ర ఆగ్రహం వ్యక్తం చేసింది. అంతేకాదు.. తనను మోసం చేసిన వారికి బుద్ధి చెప్పేందుకు తన పెళ్లికి అతిథిగా వచ్చిన హర్పాల్ సింగ్ అనే యువకుడిని అప్పటికప్పుడే వరించింది. అందరూ చూస్తుండగానే ఆమె సదరు యువకుడితో పెళ్లి చేసుకుంది. తనతో ఇలా జరగడంపై మొదట ఆశ్చర్యానికి గురైన హర్పాల్.. చివరికి ఆమెను భార్యగా అంగీకరించాడు. దీంతో అక్కడికక్కడే వారిద్దరికీ పెళ్లి జరిగిపోయింది. వీరి పెళ్లిని వధువు కుటుంబసభ్యులు కూడా అంగీకరించారు. దీంతో వరుడు కుటుంబసభ్యులు తలదించుకుని వెళ్లిపోవాల్సి వచ్చింది.

మరోవైపు ఆసుపత్రిలో చికిత్స పొందుతూ కోలుకున్న కిషోర్.. తిరిగి వచ్చి ఇందిరను భయపెట్టాడు. అయితే ఆమె ఏమాత్రం జంకకుండా ధైర్యంగా ఎదురు నిలిచింది. తమకు జరిగిన అవమానాన్ని భరించలేకపోయిన కిషోర్ బంధువులు పోలీస్ స్టేషన్ లో ఫిర్యాదు చేశారు. కానీ.. పెద్దలు వారించడంతో వారు ఆ ఫిర్యాదును వెనక్కు తీసుకున్నారు. దీంతో ఈ కథ సుఖాంథమైంది.