ప్రత్యేక వైద్య బృందాలు పంపేందుకు మోడీ సానుకూలం..

Posted: 01/21/2015 02:54 PM IST

తెలంగాణలో ప్రజల ప్రాణాలను బలిగొంటున్న మాయదారి రోగంపై ప్రధాని నరేంద్రమోడీ ఆరా తీశారు. రాష్ట్రంలో స్వైన్‌ఫ్లూపై తెలంగాణ ముఖ్యమంత్రి కేసీఆర్ ప్రధాని నరేంద్రమోదీతో ఫోన్‌లో చర్చించగా, ఆయన ఈ మేరకు ఆరా తీసినట్లు సమాచారం. ఈ నేపథ్యంలో రాష్ట్రానికి ప్రత్యేక వైద్య బృందాలను పంపాలని కేసీఆర్, ప్రధానికి విన్నవించారు. అందుకు సమ్మతించిన ప్రధాని మోడీకి కేసీఆర్ కృతజ్ఞతలు తెలిపారు. సమన్వయం చేసి సహకరించాల్సిందిగా కేంద్రమంత్రులు వెంకయ్యనాయుడు, దత్తాత్రేయలను సీఎం కోరారు.

రాష్ట్రంలో స్వైన్‌ఫ్లూ ప్రబలటంపై ముఖ్యమంత్రి కేసీఆర్ ఆందోళన వ్యక్తం చేశారు. స్వైన్‌ఫ్లూపై ప్రజలు అప్రమత్తంగా ఉండాలని సూచించారు. సీఎస్ రాజీవ్‌శర్మతో ఫోన్‌లో మాట్లాడి తాజా పరిస్థితిని తెలుసుకున్నారు. స్వైన్‌ఫ్లూ పరిస్థితులపై ఇవాళ నివేదిక ఇవ్వాలని వైద్య ఆరోగ్యశాఖను ఆదేశించారు. స్వైన్ ఫ్లూతో మంగళవారం నలుగురు వ్యక్తులు మరణించడంతో తెలంగాణ ముఖ్యమంత్రి కేసీఆర్ తీవ్ర ఆందోళన వ్యక్తం చేశారు. స్వైన్ఫ్లూపై చర్చించేందుకు సాయంత్రం కేబినెట్ భేటీ ఏర్పాటు చేయాలని ఆయన ఉన్నతాధికారులను ఆదేశించారు.

అయితే తెలంగాణలో స్వైన్ ఫ్లూ విజృంభిస్తున్న ఆరోగ్య శాఖ ఉన్నతాధికారుల నిమ్మకు నీరెత్తినట్లు వ్యవహరిస్తుండటం పట్ల కేసీఆర్ ఆగ్రహం వ్యక్తం చేశారు. స్వైన్ ఫ్లూపై సమీక్ష జరిపి వెంటనే నివేదిక అందజేయాలని కేసీఆర్... తెలంగాణ సీఎస్ రాజీవ్ శర్మను ఆదేశించారు. అలాగే రాష్ట్రంలో మరో 20 రోజులు చలిగాలులు ఉంటాయిని... ఈ నేపథ్యంలో జాగ్రత్తగా ఉండాలని రాష్ట్ర ప్రజలకు కేసీఆర్ విజ్ఞప్తి చేశారు. స్వైన్ ఫ్లూతో గత రెండు నెలల కాలంలో మొత్తం 26 మంది మృతి చెందడంపై కూడా కేసీఆర్ ఆందోళన వ్యక్తం చేశారు.

జి. మనోహర్