చంద్రబాబు అభ్యర్థనను కేసీఆర్ మన్నిస్తాడా..?

Posted: 12/16/2014 07:47 AM IST

రైతులకు రుణమాఫీ చేస్తానని చెప్పి అధికారంలోకి వచ్చిన టీడీపీ ప్రభుత్వం, పాలనపగ్గాలు చేతబట్టి ఆరుమాసాలు కావస్తున్నా.., రుణమాఫీ అంశంలో అనేక మల్లగుల్లాలు పడింది. ఎట్టకేలకు విడుదల చేసిన రుణమాఫి విధానంలో పదేళ్లుగా రైతులు అనేక అవస్థలు పడ్డారని చెబుతూనే.. రుణాలను మాత్రం కేవలం 2007 నుంచే మాఫీ చేస్తామని చెప్పడం, అసలు వడ్డీ కలిపి లక్షన్నర రూపాయల లోపు వున్న వారికి మాత్రమే వర్తింపజేస్తామని చెప్పడంతో రుణమాఫీ విధానంలో  స్పష్టత కొరవడింది.

రుణమాఫీపై తొలి సంతకం చేసి అమలుపరుస్తామనన ప్రభుత్వం కాస్తా.. క్రమంగా తమ విధానంలో మార్పలను తీసుకువచ్చి ముందుగా 50 వేలు, ఆ తరువాత లక్ష రూపాయలు, ఆ తరువాత లక్షన్నర రూపాయల రుణాలను మాఫీ చేస్తామని చెప్పడం కూడా రైతులకు మింగుడు పడటం లేదు. 2007 నుంచి రుణాలను మాఫీ చేస్తామని చెప్పిన ప్రభుత్వం.. అక్కడి నుంచి రుణాలను మాఫీ చేయాల్సింది పోయి.. రుణమాఫీలో కూడా డబ్బునే ప్రధానంగా పేర్కొంటూ మాఫీ చేయడంపై రైతులు అగ్గిమీద గుగ్గిలం అవుతున్నారు.

ఇది చాలదన్నట్లు హైదరాబాద్ నగరంలో జీవనం సాగించేందుకు వలస వచ్చిన అనేక మంది రైతులు.. వారి పోలాలపై రుణాలను పొంది.. ఆ డబ్బుతో హైదరాబాద్ కు వలసవచ్చి చిరు వ్యాపారాలు పెట్టుకుని, లేదా చిన్నపాటి ప్రైవేటు ఉద్యోగాలు చేసుకుంటూ జీవనం సాగిస్తున్నారు. అయితే వీరందరూ వారి రేషన్ కార్డులు, ఆధార్ కార్డులను జతపర్చినప్పటికీ వారికి రుణాలు మాఫీ కాలేదు. దీనికి కారణం సదరు వలసవాదులు హైదరాబాద్ లోనే మకాం వేయడం, సంబంధిత గ్రామాల్లో అధికారులు జరిపిన సర్వే జాబితాలలో వారి పేర్లు నమోదు కాకపోడమే కారణం.

అయితే ఇలా వలసవాదుల పేర్లను జాబితా నుంచి తోలగించి, వాటిని సంబంధిత నియోజకవర్గ ఎమ్మెల్యేలకు అందజేసింది ప్రభుత్వం. ఎమ్మెల్యేలందరూ తమ నియోజకవర్గాల్లోని ప్రజలు తెలుపుతున్న నిరసనల నేపథ్యంలో మరోమారు ముఖ్యమంత్రి చంద్రబాబును ఈ విషయమై అభ్యర్థించారు. వలస వెళ్లిన వారికి కూడా రుణాలను మాఫీ చేయాలని, వారు జీవనోపాధి కోసం మాత్రమే వలస వెళ్లారని వారు చంద్రబాబుకు వివరించారు. దీనిపై తరుణోపాన్ని అలోచించిన చంద్రబాబు.. వలసవెళ్లిన వారిలో అధిక శాతం మంది హైదరాబాద్ లోనే తాత్కాలికంగా స్థిరపడిన నేపథ్యంలో వారందరికీ తెలంగాణ ప్రభుత్వమే రుణమాఫీ చేయాలన్న డిమాండ్ ను తెరపైకి తీసుకురానున్నారు. హైదరాబాద్కు వచ్చిన వలసవాదుల రుణాలను మాఫీ చేశారా లేదా..? అంటూ ఆయన తెలంగాణ ప్రభుత్వాన్ని కోరనున్నారు. రుణమాఫీలో అంశంలో హైదరాబాద్ కు వలసవచ్చిన రైతల అంశాన్ని తేల్చాలని పట్టుబట్టనున్నారు. మరి ఈ అంశమై తెలంగాణ ప్రభుత్వం చంద్రబాబు విన్నపంపై సానుకూలంగా స్పందింస్తుందో లేదో..? వేచి చూడాలి మరి.

జి.మనోహర్