తెలంగాణాలో ఒలింపిక్స్, ఆంధ్రాలో జాతీయ క్రీడలు

Posted: 07/19/2014 11:44 AM IST

2024 కి హైద్రాబాద్ లో ఒలింపిక్స్ నిర్వహించాలని తెలంగాణా రాష్ట్ర ముఖ్యమంత్రి కె చంద్రశేఖర రావు పట్టుదలతో ఉంటే, కనీసం జాతీయ క్రీడలను నిర్వహించటమైనా సాధిద్దామని ఆంధ్రప్రదేశ్ ముఖ్యమంత్రి చంద్రబాబు నాయుడు  ఆశిస్తున్నారు.  

39 వ జాతీయ క్రీడలను విజయవాడలో నిర్వహించాలని కేంద్ర క్రీడల మంత్రి శర్బానంద సోనోవాల్ ని కోరుతూ శుక్రవారం లేఖ రాసిన చంద్రబాబు, కొత్త రాష్ట్రంలో క్రీడోత్సవాలను నిర్వహించటం యువతను ప్రోత్సహించటమవుతుందని తెలియజేసారు.  

అలా క్రీడోత్సవాలను నిర్వహించటానికి పూర్వానుభవం ఉందని కూడా ఆయన పేర్కొన్నారు.  2002 సంవత్సరంలో 32 వ జాతీయ క్రీడలను, 2003 లో ప్రపంచ కప్ ఛెస్, 2003 లోనే తొలి ఆఫ్రో ఏషియన్ గేమ్స్, 2005 లో ప్రీమియర్ హాకీ లీగ్, 2006లో హోప్ మెన్ ఇంటర్నేషనల్ టెన్నిస్ ఛాంపియన్ షిప్, 2007 లో ఫోర్త్ మిలటరీ గేమ్స్, 2008 లోప్రపంచ బాడ్మింటన్ ఛాంపియన్ షిప్ క్రీడలను విజయవంతంగా నిర్వహించామని చంద్రబాబు క్రీడా మంత్రి కి తెలియజేసారు.

-శ్రీజ