వాటెన్ ఐడియా సర్ జీ

Posted: 03/12/2014 11:59 AM IST

కార్ల కంపెనీలకే పెట్రోల్ అమ్మే అధికారం ఉన్నట్లయితే కార్లను ఆ కంపెనీ ఉచితంగా ఇచ్చినా నష్టముండదు.  ఎందుకంటే పెట్రోల్ లేకుండా ఆ కార్లు నడవవు కాబట్టి, తప్పనిసరిగా వాళ్ళ దగ్గర పెట్రోల్ ని కొనాల్సివస్తుంది కాబట్టి.  కారు కొనేది ఒక్కసారే కానీ పెట్రోల్ మాత్రం జీవితాంతం కొనాల్సిందే. 

ఇది వ్యాపార సూత్రం.  ఈ సూత్రాన్ని వంటబట్టించుకుంటున్న టెలిఫోన్ కంపెనీలు ఈ కాలంలో బాగా ప్రచారంలో ఉన్న స్మార్ట్ ఫోన్ లను వాళ్ళ బ్రాండ్ నేమ్ తో ప్రవేశపెట్టటానికి చూస్తున్నాయి.  అందులో రిలయన్స్ అగ్రగామిగా నిలిస్తే ఇప్పుడు ఐడియా కూడా అదే పంథాలో పోతోంది. 

అందుకే 5.5 అంగుళాల స్క్రీన్ తో 3 జి ఫోన్ ని 8 మెగా పిక్సెల్స్ కేమెరాతో 2 మెగా పిక్సెల్స్ ఫ్రంట్ కేమెరాతో 4 జిబి ఇంటర్నల్ మెమొరీతో స్మార్ట్ ఫోన్ అల్ట్రా 2 ని రూ.12500 ధరకే ప్రవేశపెడుతోంది ఐడియా సెల్యూలార్ సంస్థ.  శ్యామ్సంగ్ ఫోన్లతో పోలిస్తే ఇది చాలా తక్కువ ధరే.  కానీ ఇంకా తక్కువకు కూడా ఐడియా ఇవ్వగలదు ఒకవేళ ఆ ఫోన్ ని ఐడియా సిమ్ తో మాత్రమే ఉపయోగించగలిగినట్లయితే. 

ఐడియా సంస్థ కి ఆంధ్రప్రదేశ్, కేరళ, మహారాష్ట్ర, గోవా, మధ్య ప్రదేశ్, ఛత్తీస్ గడ్, హర్యానా, తూర్పు పడమర ఉత్తర ప్రదేశ్ రాష్ట్రాలలో 3 జి మార్కెట్ ఉండటం వలన ఈ విధంగా స్మార్ట్ ఫోన్ ని మార్కెట్ లో ప్రవేశపెట్టగలిగితే వాళ్ళ కున్న 3జి లైసెన్స్ ఉపయోగించే వినియోగదారులు ఎక్కువౌతారు. 

ఐడియా దేశంలో టెలిఫోన్ సంస్థలలో మూడవ స్థానంలో ఉంది.

-శ్రీజ