జూలో బయటపడ్డ రినో, పరుగులెత్తిన జనం

Posted: 04/11/2013 04:45 PM IST

విశాఖపట్నం ఇందిరా గాంధీ జువాలాజికల్ పార్క్ లో ఈ రోజు శలవు రోజు కాబట్టి కిటకిటలాడుతున్న సందర్శకులు మధ్యాహ్నం ప్రాణ భయంతో పరుగులు తీసారు. 

కాన్పూర్ జూ నుంచి కొత్తగా తీసుకుని వచ్చిన నకాల్ అని ముద్దుగా పిలుచుకునే 12 సంవత్సరాల ఖడ్గమృగం నాలుగు రోజులుగా ఇనుప చువ్వల వెనకనే ఉంది.  కానీ ఈ రోజు మధ్యాహ్నం ఒంటిగంట ప్రాంతంలో గేట్లను బద్దలు కొట్టుకుని మానవ సంచారం వైపు పరుగులు పెట్టింది.  దానితో భయపడ్డ సందర్శకులు ప్రాణాలు దక్కించుకోవటం కోసం శక్తికొద్దీ పరుగు తీసారు.  ఆ హడావిడిలో తొక్కిసలాట జరిగి కొందరు కింద పడగా స్వల్పగాయాలు కూడా అయ్యాయని వార్త. 

జూ యాజమాన్యం తేరుకుని ఖాళీ చేయిద్దామని అనుకుంటుండగానే నకాల్ సంభార్ (జింకల)నివాసంలోకి పోయి తాపీగా అక్కడో నీటి మడుగులో సెటిల్ అయి కూర్చుంది.  నకాల్ కి స్పృహ తప్పే బులెట్ ప్రయోగంతో పట్టుకోవటం కోసం ఇందులో నైపుణ్యమున్న షార్ప్ షూటర్స్ కోసం జూ యాజమాన్యం వెతుకుతోంది. 

-శ్రీజ