Posted: 03/14/2013 08:10 AM IST

యాదగిరి గుట్ట నరసింహ స్వామి బ్రహ్మోత్సవాలు ఈ రోజు నుంచి ప్రారంభమయ్యాయి.  ఈ ఉత్సవాలు 11 రోజులు సాగుతాయి.  ఆగమ శాస్త్ర పద్ధతిలో ప్రాచీనమైన ఆచారంలో నిష్టగా సాగే అర్చనాది కార్యక్రమాలు జరపటానికి ఆలయ యాజమాన్యం అన్ని ఏర్పాట్లను పూర్తి చేసుకుందని ఈవో కృష్ణవేణి తెలియజేసారు.   24 వరకూ జరిగే ఈ ఉత్సవాలకు భక్తులు అధిక సంఖ్యలో వస్తారని ఆలయ యాజమాన్యం భావిస్తోంది.

ముఖ్యమైన కార్యక్రమాలలో, 21 న జరిగే కళ్యాణోత్సవానికి ముందుగా 20 వ తేదీన ఎదుర్కోలు ఉంటుంది.  22 న రథోత్సవం, ఆఖరి రోజు 24 న అష్టోత్తర శత ఘటాభిషేకం, డోలోత్సవాలుంటాయని ఈవో తెలియజేసారు.

ఆంధ్రప్రదేశ్ లోని పురాతనమైన ఆలయాల్లో హైద్రాబాద్ కి సమీపంలో నల్గొండ జిల్లాలోని యాదగిరి గుట్ట ఒకటి.  హైద్రాబాద్ కి దగ్గరగా ఉండటం, వరంగల్ హై వే మీద ఉండతో ఈ ఆలయానికి రాకపోకలకు చాలా సౌకర్యంగా ఉంటుంది.  అందువలన ఈ పుణ్యక్షేత్రానికి ఎంతో ప్రాముఖ్యత ఉంది.  హైద్రాబాద్ కి చేరువగా ఉండటంతో రియల్ వ్యాపారం కూడా ఇక్కడ చాలా సంవత్సరాలుగా బాగా సాగుతోంది.  దాని వలన కూడా ఈ ప్రాంతమంతా అభివృద్ధి చెందుతూ వస్తోంది.

భక్తులకు సౌకర్యాలకోసం ఆలయ ప్రాంగణమెంత అభివృద్ధి చేసినా గర్భగుడిని యథా తథంగా ఉంచి ఈ ఆలయంలో ప్రాచీన విశిష్టతకు భంగం కలుగకుండా చూసుకోవటం ఇక్కడి విశేషం.

-శ్రీజ