Posted: 01/23/2013 06:43 PM IST

తెలంగాణపై ఢిల్లీలో కీలకమైన చర్చలు జరిగాయి. కేంద్ర నాయకులు షిండే, వయలార్ రవి, గులాం నబీ ఆజాద్, అహ్మద్ పటేల్ బుధవారంనాడు పార్టీ అధ్యక్షురాలు శ్రీమతి సోనియా గాంధితో కీలకమైన చర్చలు జరిపారు. తెలంగాణ ఇస్తే ఏమిటి, ఇవ్వకపోతే ఏమిటన్న అంశంపైనే ప్రధానంగా చర్చ జరిగినట్టు తెలుస్తున్నది. హోం మంత్రి సుశీల్ కుమార్ షిండే గతంలో జరిగిన అఖిల పక్ష సమావేశంలో ఈ 28 వ తేదీ కల్లా తెలంగాణాపై అధికార ప్రకటన వెలువడుతుందని ప్రకటించడంతో అందరూ ఆ తేదీ కోసం ఎదురుచూస్తున్నారు. ఈలోగా కేంద్రంలోని ముఖ్యమైన నాయకులు వివిధ వర్గాలవారితో సంప్రదింపులు జరుపుతున్నారు. జరిగిన సమావేశం తెలంగాణ కు సంబంధించి అతి కీలకమైన సమావేశంగా భావిస్తున్నారు. తెలంగాణ అనుకూలంగా, ప్రతికూలంగా అందించిన వివరాలను కేంద్ర నాయకులు నేటి సమావేశంలో సోనియాకు వివరించినట్టు తెలుస్తున్నది. అలాగే హోం శాఖ నిఘా విభాగం అందించిన నివేదిక సారాంశాన్ని కూడా షిండే ఈ సమావేశంలో సోనియాకు వివరించినట్టు తెలుస్తున్నది. ఈ సమావేశం గురించి ఎవరు ఏమి అడిగినా ఢిల్లీలో ఎవరూ ఏమీ వెల్లడించడానికి సిద్ధంగా లేరు. దీన్ని బట్టి 28 వ తేదీన ఖచ్చితంగా కేంద్రంనుంచి తెలంగాణపై అంతిమ ప్రకటన వెలువడగలదని విశ్వసిస్తున్నారు.