Posted: 06/07/2012 01:50 PM IST

అంధులకు, దృష్టి లోపం ఉన్న వారి కోసం ప్రత్యేకంగా దేశంలోనే తొలిసారిగా రూపొందించిన ఆటోమేటెడ్ టెల్లర్ మెషీన్ (ఏటీఎం)ను గుజరాత్‌లో ప్రారంభించారు. యూనియన్ బ్యాంక్ ఆఫ్ ఇండియా ఈ ఏటీఎంను నిర్వహిస్తోంది. బ్యాంకు చైర్మన్, మేనేజింగ్ డెరైక్టర్ డి. సర్కార్ అహ్మదాబాద్‌లోని బ్లైండ్ పీపుల్ అసోసియేషన్ ఆవరణలో ఈ మాట్లాడే ఏటీఎంను ప్రారంభించారు. అనంతరం ఆయన మాట్లాడుతూ... ‘ముంబైలోని యూనియన్ బ్యాంకు భవనానికి జాతిపిత మహత్మా గాంధీ శంకుస్థాపన చేశారు.  ఆయన సొంత రాష్ట్రమైన గుజరాత్‌లో మాట్లాడే ఏటీఎంను ప్రారంభించినందుకు సంతోషంగా ఉంది’ అని అన్నారు. అంధులు, దృష్టి లోపం ఉన్న వినియోగదారులు ఏటీఎంకు హెడ్‌సెట్ అమర్చి, అందులో విన్పించే సూచనలు పాటించి... ఏటీఎం సేవలు ఉపయోగించుకోవచ్చని వివరించారు. అహ్మదాబాద్‌లో దాదాపు 20 వేల మంది అంధులు ఉన్నారని, వారికి ఈ ఏటీఎం ఎంతో సహకరిస్తుందని చెప్పారు. సాధారణ ప్రజలు కూడా దీన్ని ఉపయోగించుకోవచ్చన్నారు.