Posted: 04/29/2012 03:06 PM IST

       ప్రత్యేక తెలంగాణ రాష్ట్రం కోసం మరో 11 ఏళ్లయినా ఉద్యమం చేస్తామన్న కేసీఆర్‌ వ్యాఖ్యలపై కాంగ్రెస్‌ మండిపడింది. మరో 11 ఏళ్ల పాటు ఉద్యమం పేరుతో కేసీఆర్‌ దోచుకు తినాలని చూస్తున్నారని మండిపడ్డారు. ఆయన వ్యాఖ్యలు తెలంగాణపై ఆయనకు చిత్తశుద్ధి లేదనడానికి నిదర్శనమని ఏఐసీసీ కార్యదర్శి పొంగులేటి సుధాకర్‌రెడ్డి విమర్శించారు. కేవలం కుటుంబ ప్రయోజనాల కోసమే ఉద్యమం చేస్తున్నారన్న ఆయన రాజకీయ దుర్భుద్ధితోనే కాంగ్రెస్‌ను విమర్శిస్తున్నారని అన్నారు.
      ఇదిలా ఉండగా,  టీఆర్‌ఎస్‌ అధినేత కేసీఆర్‌ ఈరోజు తెలంగాణ భవన్‌లో వరంగల్‌ జిల్లా నేతలతో సమావేశమయ్యారు. పరకాల అభ్యర్థి, పల్లెబాట, ఉప ఎన్నికల ప్రచార వ్యూహాలపై కేసీఆర్‌ నేతలతో చర్చించినట్లు తెలిసింది.  మరోపక్క విద్యాశాఖలో 610 జీవో సమగ్ర అమలులో అవకతవకలు జరిగాయని టీఆర్‌ఎస్‌ నేతలు ఆరోపించారు. తెలంగాణ జిల్లాల్లో అధికారులు నిబంధనలకు విరుద్ధంగా స్థానికులనే బదిలీచేస్తున్నారని ఆ పార్టీ నేతలు క్యాంపు కార్యాలయంలో సీఎం కిరణ్‌కుమార్‌రెడ్డికి ఫిర్యాదు చేశారు. 610 జీవో సమగ్ర అమలుకు సంబంధించి ఉమ్మడి శాసనసభా సంఘం వేయాలని వారు డిమాండ్‌ చేశారు. తమ డిమాండ్‌ను సీఎం సానుకూలంగా స్పందించారని నేతలు తెలిపారు. సీఎంను కలిసిన వారిలో టీఆర్‌ఎస్‌ ఎమ్మెల్యే హరీష్‌రావుతోపాటు పలువురు నేతలు ఉన్నారు

...avnk