Posted: 02/26/2012 05:20 PM IST

చంద్రబాబు నాయుడుపై తెలంగాణ రాష్ట్ర సమితి అధినేత కే. చంద్రశేఖరరావు మరోమారు తాజాగా విరుచుకుపడ్డారు. తనదైన శైలిలో లయబద్ధంగా విమర్శలు కురిపించారు. తెలంగాణ భవన్‌లో మీడియా సమావేశం నిర్వహించిన కేసీఆర్... చంద్రబాబు తనపై చేస్తున్న అసత్య ప్రచారాలపై మండిపడ్డారు. తనకు 70 ఎకరాల భూమి ఉందన్న ఆరోపణల్ని నిరూపించాలని కేసీఆర్ ఈ సందర్భంగా సవాలు విసిరారు.

చంద్రబాబుది లత్కోర్ విధానమన్నారు. తెలంగాణలో చంద్రబాబుకు ఇవే చివరి ఎన్నికలని, మోసానికి, నయవంచనకు బాబు ప్రతిరూపమన్నారు. రెండు ఎకరాల యజమాని భార్య అయిన చంద్రబాబు తల్లికి 50 లక్షల ఆస్తి ఎక్కడిదని ప్రశ్నించారు. తన కొడుకు చదువు కోసం స్టాన్‌ఫోర్డ్ యూనివర్సిటికి చెల్లించిన 22 కోట్ల రూపాయలు ఎక్కడినుంచి, ఏ బ్యాంక్ నుంచి చెల్లించారో వెల్లడించాలని చంద్రబాబును ప్రశ్నించారు.

చంద్రబాబు ఢిల్లీలోని సుజానా చౌదరీ గెస్ట్హౌజ్‌లో కేంద్ర హోంశాఖ మంత్రి చిదంబరం కాళ్లు పట్టుకున్నారన్నారు. మద్య నిషేధానికి తూట్లు పొడిచిన చంద్రబాబు.. మద్యంపై మాట్లాడటం హస్యాస్పదంగా ఉందని ఎద్దేవా చేశారు. దేవేందర్ గౌడ్ పైనా విమర్శలు ఎక్కుపెట్టారు. దేవేందర్ గౌడ్ చరిత్ర ఎవరికి తెలువదని.. ఆయనో బుడ్డెరఖాన్ అన్నారు. తెలంగాణ సాధన కోసం పెట్టిన పార్టీని ఆరు నెలల్లోనే మూసి.. ప్రజారాజ్యం చేరి ఆతర్వాత సమైక్యాంధ్రవాదులు బూట్లను దేవేందర్ గౌడ్ తుడుస్తున్నారని తట్లపురాణం అందుకున్నారు.

...avnk