Posted: 02/20/2012 03:15 PM IST

అది.. రంగారెడ్డిలోని ఓ ఇంజనీరింగ్ కళాశాల. విద్యార్థుల ఉపకార వేతనాలు, బోధన ఫీజులకు వచ్చిన దరఖాస్తులను పరిశీలించే కార్యక్రమంలో భాగంగా ఒక మహిళా అధికారి ఆ కాలేజీకి వద్దకు వచ్చారు. అక్కడ కాలేజీ అయితే ఉందిగానీ... దాని పేరు మాత్రం ఆ అధికారి చేతుల్లో ఉన్న దరఖాస్తులో పేర్కొన్న కాలేజీ కాదు!! అది వేరే ప్రముఖ కాలేజీ. తప్పు చిరునామాకు వచ్చానేమోనని ఆమె మరోసారి సరిచూసుకున్నారు. అడ్రస్ అదే! అంటే ఆమె వచ్చింది సరైన చోటుకే..! ఈ వ్యవహారం ఏదో తేడాగా ఉందని ఆవిడకు అనుమానం వచ్చి మరోసారి పరిశీలన చేయగా... అసలు గుట్టు బయటపడింది!! 

ఆ దరఖాస్తులో ఉన్నది ఓ బోగస్ కాలేజీ! కాగితాల్లో మాత్రమే మనుగడ సాగిస్తున్న దొంగ కాలేజీ. 2011-12 సంవత్సరానికిగాను ఆ కాలేజీలో చదువుతున్న విద్యార్థులు సమర్పించినట్టుగా 390 దరఖాస్తులు వచ్చాయి. ఆ వివరాలను క్షేత్రస్థాయిలో పరిశీలించేందుకు అధికారి రావడంతో అసలు విషయం బయటపడింది. ఇంకా దిగ్భ్రాంతి కలిగించే నిజమేంటంటే... ఈ ఏడాదే కాదు, గత కొన్నేళ్లుగా ఆ 'దొంగ కాలేజీ' ఇదే తరహాలో దోపిడీ చేస్తోంది.

ఏటా ఆ కాలేజీ పేరిట ఫీజులు కూడా మంజూరయిపోతున్నాయి. ఈ విషయాన్ని గుర్తించిన ఆ మహిళా అధికారి కాలేజీ యాజమాన్యాన్ని గట్టిగా నిలదీయగా వారు నీళ్లు నమిలారు. సదరు అధికారికి 'నచ్చజెప్పే' ప్రయత్నం చేశారు. కానీ ఆమె ఈ వ్యవహారం గురించి.. సాంఘిక సంక్షేమ శాఖ ముఖ్య కార్యదర్శి రేమండ్ పీటర్‌కు సమాచారం అందించారు. దీంతో ఆయన నేరుగా రంగారెడ్డి జిల్లాకు వెళ్లి తనిఖీ నిర్వహించారు.