Posted: 02/19/2012 02:23 PM IST

ప్రభుత్వం చట్టాన్ని ఉల్లంఘించిందని, అందుకు ఏస్టేషన్లో ఫిర్యాదు చెప్పాలని నిన్న రైతులకు లాభాసాటి ధర లభించేందుకు చర్యగా పాదయాత్ర చేపట్టిన లోక్ సత్తా పార్టీ అధినేత జయప్రకాశ్ నారాయణ అన్నారు. నిత్యావసరాల చట్టం ఒక రాష్ట్రం నుంచి మరో రాష్ట్రానికి సరఫరా, అమ్మకం, పంపిణీలను అడ్డుకోవద్దని స్పష్టంగా చెప్తున్నదని, దాన్ని తుంగలోతొక్కిన రాష్ట్ర ప్రభుత్వం రైతుల నడ్డి విరుస్తూ ధాన్యాన్ని రాష్ట్రం బయటకు తీసుకెళ్ళటానికి ఆంక్షలు పెట్టిందని, గిట్టుబాటు ధరే పలకని సందర్భంగా రైతులు ఎలా జీవిస్తారని కర్నూలు నుంచి రైతు సత్యాగ్రహ పాదయాత్ర చేపట్టిన జెపి అన్నారు.

ఎమ్మిగనూరు నుంచి బయలుదేరి మాచాని సోమప్ప కూడలిలో మాట్లాడుతూ, రైతులెప్పుడూ ఇతరుల ధర్మం బిక్షం మీద ఆధారపడాలని అనుకోలేదని, పాలకులే వారిని భిక్షగాళ్ళుగా మారుస్తున్నారని జెపి ఆరోపించారు. ఉల్లిపాయల ధర కిలో 15 రూపాయలకు పెరిగిపోయినప్పుడు పాకిస్తాన్ నుంచి ఉల్లిపాయలను తీసుకునివచ్చి ఇక్కడ సరఫరా చేసారని, మరి మనదేశంలోనే ఒక రాష్ట్రం నుంచి మరో రాష్ట్రానికి తీసుకెళ్ళటానికి ఆటంకాలెందుకు ఏర్పరుస్తున్నారని జెపి ప్రశ్నించారు.

36 కిలోమీటర్ల పాదయాత్రానంతరం కర్నాటక సరిహద్దు ప్రాంతాలకు చేరుకుని గిల్కాసూగూర్ దగ్గర ధాన్యాన్ని విక్రయించేందుకు సత్యాగ్రహ యాత్రను రచించిన జెపిని అరెస్ట్ చెయ్యటానికి రంగం సిద్ధమౌతోంది. కానీ అరెస్ట్ లకు కాని, హింసలకు కాని తలవొగ్గవద్దని పార్టీ శ్రేణులకు పిలుపునిచ్చారు. చట్టాన్ని ఉల్లంఘిస్తానని ప్రకటించి మరీ అందుకు పూనుకున్న జయప్రకాశ్ నారాయణను అడ్డుకోవటానికి, అవసరమైన చర్యలు తీసుకోవటానికి అధికారులు సన్నాహాలు చేసుకుంటున్నారు.

-శ్రీజ