Posted: 02/16/2012 10:47 AM IST

ఆర్థిక మంత్రి ఆనం రామనారాయణ రెడ్డి శాసన సభలో బడ్జెట్ ని ప్రవేశపెట్టటానికి ఒక రోజు ముందుగానే రాష్ట్ర ప్రభుత్వానికి చెందిన 21 వెబ్ సైట్లు హాకింగ్ కి గురయ్యాయి. విజయవంతంగా ప్రభుత్వ వెబ్ సైట్లల్లోకి ప్రవేశించటమే కాకుండా ప్రభుత్వం ప్రవేశపెట్టదలచుకున్న బడ్జెట్ ఉన్న సైట్ కి హాకర్ల ఒక పేజీని కూడా జోడించటం విశేషం.

విచిత్రమేమిటంటే హాకింగ్ చేసినవాళ్ళు ఒరిజినల్ వివరాలనేమీ ముట్టుకోలేదు. పాడు చెయ్యలేదు. దానికి అదనంగా ఒక పేజీని అతికించి అందులో తమ సందేశాన్ని పొందుపరిచారు. దాని సారాంశమేమిటంటే- హాకింగ్ చేసినవారేమీ అతివాదులు కారు. వివరాలను దొంగిలిద్దామని కానీ మరేదో దుడుకుతనానికి పాల్పడదామని కాదు.  కేవలం తమ సామర్థ్యాన్ని నిరూపించుకోవటానికి చేసిందే.

రాష్ట్ర ప్రభుత్వానికి చెందిన వివిధ వెబ్ సైట్లనూ తెరచి చూడగలిగారంటే ప్రభుత్వం మరింత శ్రద్ధ తీసుకోవాలని తెలుస్తోంది. ఈ సారి హాకింగ్ చేసినవారెటువంటి దురాగతాలకూ పాల్పడలేదు. కానీ అలా జరిగే అవకాశముందని సూచిస్తున్నారు. బడ్జెట్ తో పాటు గెజిట్ నోటిఫికేషన్స్, జివోలు, కమర్షియల్ టాక్స్, ఫాక్టరీలు, హార్టికల్చర్, గ్రామీణాభివృద్ధి లాంటి ప్రభుత్వ సైట్లను సెర్వర్ లో తెరచి అవి ఎంత వీక్ గా ఉన్నాయో చూపించారు.

ఈసారి మొదటిసారిగా పేపర్ అవసరం లేకుండా బడ్జెట్ ని ప్రవేశపెడదామని ప్రభుత్వం నిర్ణయించుకున్న సమయంలోనే హాకింగ్ బారిన పడటం ప్రభుత్వాధికారుల్లో కలవరం రేపుతోంది.

-శ్రీజ