Posted: 02/15/2012 10:15 AM IST

ఎట్టకేలకు జూడాలు సమ్మె విరమించారు. నిన్న విద్యాశాఖా మంత్రి కొండ్రు మురళీ మోహన్ తో రాత్రి 11 గంటల వరకూ సాగిన చర్చల ఫలితంగా జూడాలు తాత్కాలికంగా సమ్మెను విరమించుకుంటున్నట్టుగా తెలియజేసారు. చర్చలలో తీసుకున్న నిర్ణయాల మేరకు రాతపూర్వకంగా ప్రభుత్వం హామీ ఇచ్చిన తర్వాత సమ్మెను పూర్తిస్థాయిలో నిలిపివేస్తామని మాటిచ్చారు.

ఎమ్మెల్సీ నాగేశ్వర్ చొరవతో అంతకు ముందు ప్రభుత్వంతో ఫలించని చర్చలు నిన్న సచివాలయంలో సుదీర్ఘ చర్చల అనంతరం ఒక కొలిక్కి వచ్చాయి. ప్రభుత్వం అంగీకరించిన వారి కోరికల విషయంలో మౌఖికమైన హామీ తర్వాత అవే రాత పూర్వకంగా ఉండాలని ముందు పట్టుబట్టినా, చివరకు సమ్మెను తాత్కాలికంగా విరమించటానికి ఒప్పుకున్నారు.

జూనియర్ డాక్టర్ల సమ్మె ఉధృతమై అత్యవసర సేవలను కూడా బహిష్కరించటంతో రాష్ట్రవ్యాప్తంగా రోగులకు ఎంతో ఇబ్బందులు ఎదురవటమే కాకుండా, ఇటు జూడాలు, అటు ప్రభుత్వం కూడా ప్రజల నిరసనలకు పాత్రలవుతున్నారు. ఎవరూ పట్టు విడవకుండా ఉండటంతో పరిస్థితి చెయిదాటి పోతున్న సందర్భంలో జరిగిన ఈ ఒప్పందంతో పరిస్థితి మళ్ళీ కుదుటపడటానికి అవకాశం లభించటంతో పాటుగా కొత్తగా విద్యా శాఖా మంత్రి గా పదవీ బాధ్యతలను చేపట్టిన కొండ్రు మురళి కూడా వస్తూనే ఒక సమస్యను పరిష్కరించిన పేరు కూడా దక్కించుకున్నారు.

ఒక పక్క చర్చలు సాగిస్తూనే మరో పక్క హైకోర్టు సాయం కూడా తీసుకున్న ప్రభుత్వం అత్యవసర సేవల దృష్ట్యా జూడాల మీద ఎస్మా ప్రయోగించటానికి సిద్ధపడింది. హాస్పిటల్స్ లో రోగులు ప్రాణాలు పోగొట్టుకోవటం ప్రభుత్వానికి, డాక్టర్లకూ కూడా చెడ్డ పేరు తెచ్చి పెడుతోంది. నిన్న జరిగిన చర్చలతో ప్రభుత్వానికి, జూడాలకు కూడా సంకటావస్థనుంచి బయటపడటానికి మార్గం లభించింది.

-శ్రీజ