Posted: 02/01/2012 01:01 PM IST

తెలంగాణా ఉద్యమం మరోసారి ఊపందుకోబోతున్నదని, త్వరలోనే బస్సు యాత్ర ప్రారంభమౌతుందని తెలంగాణా ఐకాస చైర్మన్ కోదండరామ్ ప్రకటించారు. మహబూబ్ నగర్ జిల్లా తెలంగాణా ఐకాస చైర్మన్ రాజేందర్ రెడ్డి ఆధ్వర్యంలో నిన్న మహబూబ్ నగర్ లో తెలంగాణా చౌరస్తాలో ధర్నా చేసారు. ఈ సందర్బంలో ఆ కార్యక్రమానికి హాజరైన కోదండరామ్ మాట్లాడుతూ, బస్సు యాత్ర కార్యక్రమ వివరాలను త్వరలోనే ప్రకటిస్తామని అన్నారు. నాయకుల మీద అక్రమంగా కేసులు పెడుతున్నారని ప్రభుత్వం మీద ఆరోపణలు చేస్తూ, తెలంగాణా కోసం త్యాగం చేసినవారిని తిరిగి గెలిపించుకోవాలని పిలుపునిచ్చారు.

ఈ కార్యక్రమంలో తెలంగాణా నగారా సమితి అధ్యక్షుడు నాగం జనార్దనరెడ్డి, మాజీ మంత్రి జూపల్లి కృష్ణారావు, జెఏసి అధికార ప్రతినిధి శ్రీనివాస్ గౌడ్ తదితరులు పాల్గొన్నారు. నాగం జనార్దన రెడ్డి మాట్లాడుతూ, సకల జనుల సమ్మెలో పాల్గన్న ఉద్యోగుల సమ్మె కాలాన్ని రెగ్యులరైజ్ చేస్తానని మాటిచ్చి తప్పుకున్న కిరణ్ కుమార్ ప్రభుత్వం అందుకు తగిన మూల్యం చెల్లించుకుంటుందని, బడ్జెట్ సమావేశాల తర్వాత ఆయన గద్దె దిగవలసిన పరిస్థితి వస్తుందని అన్నారు. చంద్రబాబు, కిరణ్ కుమార్ కలిసి విద్యార్థుల మీద రాయలసీమ రౌడీయిజాన్ని చూపిస్తున్నారని, అవసరమైతే సాయుధపోరాటం కూడా చెయ్యటానికి సిద్ధమేనని జూపల్లి అన్నారు.

కార్యక్రమం అంతంలో వినతిపత్రాన్ని ఇవ్విటానికి మూకుమ్మడిగా కలెక్టరేట్ తరలివెళ్ళిన సందర్భంలో పోలీసులకూ ఆందోళనకారులకూ మధ్య తోపులాటలు జరిగాయి.

-శ్రీజ