Posted: 01/31/2012 02:43 PM IST

2జి కుంభకోణంలో నిందితులుగా గుర్తించిన అధికారుల మీద చర్యలు తీసుకోవటంలో ప్రధానమంత్రి కార్యాలయం తాత్సారం చేస్తోందని జనతా పార్టీ అధ్యక్షుడు సుబ్రమణ్యస్వామి సుప్రీం కోర్టులో వేసిన పిటిషన్ ని సుప్రీం కోర్టు స్వీకరించింది. దానితో మరోసారి కేంద్ర ప్రభుత్వం డిఫెంస్ లో పడింది. సుబ్రహ్మణ్యస్వామి తన పిటిషన్ లో ప్రభుత్వం చాలా ఎక్కువగా జాప్యం చేస్తోందని ఫిర్యాదు చేసారు.

నిందితులుగా పేర్కొన్న వారి మీద విచారణ జరిపించటానికి దర్యాప్తు సంస్థలకు అనుమతులివ్వాలని, ఆ పని మూడు నెలల లోపులోనే జరగాలని జస్టిస్ జిఎస్ సింఘ్వి, జస్టిస్ ఎ కె గంగూలీ ల ధర్మాసనం ఆదేశించింది. ప్రధాని కార్యాలయానికి ఆదేశాలివ్వలేమని అన్న హైకోర్టు తీర్పుని పక్కకు నెడుతూ, నాలుగు నెలల లోపులో అనుమతులు రాకపోతే ప్రధాని కార్యాలయం అనుమతించినట్టుగా భావించబడుతుందని సుప్రీం కోర్టు తీర్పిచ్చింది. మాజీ టెలికాం మంత్రి ఎ.రాజాను ఈ కేసులో ప్రాసిక్యూట్ చెయ్యటానికి ఆదేశాలివ్వాలని కోరిన సుబ్రమణ్యస్వామి పిటిషన్ కి లోకస్ స్టాండి ఉందని సుప్రీం కోర్టు అభిప్రాయపడింది. అవినీతి నిరోధం కింద ప్రభుత్వోద్యోగి మీద ఫిర్యాదు చేసే హక్కుందని కూడా ధర్మాసనం తెలియజేసింది.

అయితే కేంద్ర ప్రభుత్వం సుబ్రమణ్య స్వామి చేసిన ఆరోపణలన్నిటినీ అంగీకరించటం లేదని, ప్రధాన మంత్రి కార్యాలయం రాజా మీద చర్య తీసుకోవటానికి ఇవ్వవలసిన అనుమతిని పరిశీలిస్తోందని, దర్యాప్తు సంస్థల నుండి ఇంకా రావలసిన నివేదికలవలన జాప్యం జరుగుతోందని అఫిడవిట్ ఫైల్ చేసింది.

-శ్రీజ