Posted: 01/07/2012 02:41 PM IST

హైద్రాబాద్ లో రామాంతపూర్ లో నిర్వహించిన సహస్ర తులసీ శ్రీనివాసం పూజానంతరం అనుగ్రహ భాషణం చేసిన త్రిదండి చిన జియ్యర్ స్వామి, అందరూ భక్తి తత్త్వంలో స్వార్థ రహితంగా పూజలు చెయ్యాలని సూచించారు. వెయ్యి కలశాలతో పూజ నిర్వహించటం జరిగిన తర్వాత, ఇలా కార్యక్రమాలు పెట్టినప్పుడే కాకుండా పదిమందైనా సరే బృందంగా ఏర్పడి ఇలాంటి సహస్ర తులసీ శ్రీనివాసం పూజలు చేసుకోవాలని జియ్యర్ స్వామి కోరారు. వివిధ ప్రాంతాల్లో నిర్వహించిన సహస్ర తులసీ శ్రీనివసం కార్యక్రమంలో, ప్రజల్లో ఉండవలసిన నిస్వార్ద సేవా భావం, సర్వ మానవ, సర్వ ప్రాణి ప్రేమల గురించి ఉపదేశాలిచ్చారు.

సమాజ సేవలో భక్తి పేరుతో అందరినీ ఒక త్రాటి మీదకు తెచ్చే ప్రయత్నంలో అహర్నిశలూ కృషి చేస్తున్న జియ్యర్ స్వామి తిరుపతిలో జరుగుతున్న వ్యవహారం మీద మనస్తాపాన్ని వ్యక్తం చేసారు. ఆధ్యాత్మిక కేంద్రాలు వ్యాపార కేంద్రాలుగా మారుతున్నాయని వాపోయారు.

అయితే వీరు కూడా ఏమీ పుచ్చుకోకుండా ఏ ఆధ్యాత్మిక కార్యక్రమానికీ ఆహ్వానించినంత మాత్రాన రారు. ప్రతి కార్యక్రమానికీ ఒక రేటు ఉంటుంది. ఎవరు బడితే వారు ఎప్పుడబడితే అప్పుడు ఆయనను దర్శించుకోవటానికీ వీలుండదు. చర్చ్ కి వెళ్తే మనకిస్తారు, మన దేవాలయాల్లో పుచ్చుకుంటారు అని వ్యాఖ్యానించిన జియ్యర్ స్వామి, వారి దగ్గరికి పోయేవారికి ఏమిస్తారో తెలియజేయలేదు. ఒకవేళ అది ఆశీర్వాదమే అయితే, తిరుపతిలో కూడా వేంకటేశ్వరుని కృప లభ్యమౌతూనేవుందిగా. ఆధ్యాత్మికమైనా సామాజిక సేవలకైనా ధనం లేకుండా ఏ కార్యమూ జరగదు కనుక దాన్ని సేకరించటానికి ఒక్కో సంస్థకి ఒక్కో విధానముంటుంది అని దేవాలయ అధికారులు, సిబ్బంది పైకి అనలేక చెవులు కొరుక్కుంటున్నారు.

-శ్రీజ