Posted: 01/02/2012 05:49 PM IST

కల్తీసారా తాగి విజయవాడ మైలవరంలో మృతి చెందిన పేదల విషయంలో స్పందించిన చిరంజీవి, కొన ఊపిరితో మృత్యువుతో పారాడుతున్నవారికి మెరుగైన వైద్య సేవలందించటమే కాక, మద్యపాన నిషేధం మీద ప్రచారం చెయ్యటానికి ప్రభుత్వమే పూనుకోవలసిన అవసరం ఉందని ముఖ్యమంత్రికి రాసిన బహిరంగ లేఖలో పేర్కొన్నారు. మద్యం మీద వచ్చే ఆదాయాన్ని ప్రభుత్వం పెంచుకునే దిశగా అడుగలు వెయ్యటం తగదని తన లేఖలో చిరంజీవి హితవు పలికారు. ఎన్ని సంఘటనలు జరిగినా ఎక్సైజ్ అధికారులు పట్టనట్టుగా వ్యవహరిస్తున్నారని, అక్రమార్జన చేసేవారికి సహకరిస్తున్నారని చెప్తూ, మద్య పానానికి వ్యతిరేకంగా ప్రచారం చేసే చర్యలు తీసుకోవాలని చిరంజీవి కోరారు.

ఇప్పటి వరకూ మద్యం సీసాల మీద చట్టబద్ధమైన హెచ్చరికగా మద్యం సేవించటం హానికరమని ప్రకటించే బాధ్యతను మద్యం పంపిణీదారుల మీద వేసారు. ఆ హెచ్చరికలు వాటిమీద ఉన్నాకానీ దాని ప్రభావం ఎక్కడా కనిపించటం లేదు. వాటి మీద వేసిన గరిష్ట ధరలను అమ్మకందార్లు, మద్యవినియోగం హానికరమనే హెచ్చరికను వినియోగదారులూ పట్టించుకోవటం లేదు. ఫలితంగా మద్యపానం ఎక్కువైంది, ధరలు పెరిగిపోవటంతో చౌక సారాల మీద పడుతున్నారు, అది కాస్తా కల్తీలకు లౌనై తాగేవారికి, ఎప్పుడో కాదు ఇప్పుడే హానికరమని ఋజువు చేస్తున్నాయి.

ఈ నేపథ్యంలో చిరంజీవి లాంటి ప్రజాకర్షణగల నాయకులు పూనుకుని మద్యపాన వ్యతిరేక ప్రచారం కోసం పాటుపడటం స్వాగతించదగ్గ విషయం.

-శ్రీజ