Posted: 01/02/2012 05:41 PM IST

ఐపిఎస్ కృష్ణ ప్రసాద్ హత్య కేసులో నిందితుడు, హిజుబుల్ ముజాహుదీన్ ఉగ్రవాద సంస్థ సభ్యుడు అయిన నజీబ్ అహ్మద్ 20 సంవత్సరాలుగా పోలీసులకు దొరకకుండా మారువేషాలతో తప్పించుకుని తిరుగుతున్నాడు. ఇతనితో పాటు సహనిందితుడైన ముజీబ్ మాత్రం 1992 లో పట్టుబడి యావజ్జీవి శిక్ష అనుభవిస్తూ, 2004 లో ప్రభుత్వ క్షమాభిక్ష మీద విడుదలయ్యాడు. కానీ పాత అలవాట్లకు, సులభంగా వచ్చే ఆదాయానికి అలవాటు పడ్డ ముజీబ్ ఆయుధాలను సరఫరా చేస్తూ పట్టుబడ్డాడు. మజీబ్ కి నజీబ్ సన్నిహితుడు.

కౌంటర్ ఇంటెలిజెన్స్ ఆపరేషన్ ద్వార పట్టుబడ్డ నజీబ్ అహ్మద్, తప్పించుకుని తిరుగుతున్న ఈ 20 సంవత్సరాల కాలంలో ఏమేం చేసాడన్నదానిమీద కూడా పోలీసులు ఆరా తీస్తున్నారు. నజీబ్ ను రేపు కోర్టులో హాజరు పరచే అవకాశం ఉంది. కృష్ణ ప్రసాద్ హత్య అతని మీద కేసు ఎలాగూ ఉంది. దానికి తోడు అతనింకా ఏమేమి నేరాలు చేసాడో తెలుసుకోవాలన్న ఆత్రుత పోలీసుల్లో బాగా ఉంది. ఒక నేరస్తుడు 20 సంవత్సరాలు ఖాళీగా ఉంటాడా. జైలు శిక్ష అనుభవించి బయటకు వచ్చిన ముజీబ్ కూడా పాత నేరభరిత జీవితానికి తిరిగి పోయినప్పుడు, పోలీసులనే తప్పించుకుని తిరుగుతున్న నజీబ్ సాధు వర్తనం కలిగివుంటాడన్నది నమ్మలేని విషయం. అందుకే సిటీ పోలీసులు, కౌంటర్ ఇంటెలిజెన్స్ కూడా ఆ కూపీ లాగే పనిలో పడింది.

కానీ ముజిబ్ విశాఖపట్నంలో జైలు జీవితాన్ని గడుపుతున్న కాలంలో జైలు అధికారులు అతన్ని చాలా చక్కగా చూసుకున్నారని, అతన్ని సెల్ ఫోన్ వాడుకోనిచ్చారని, అతనికింకా జెకెఎల్ఎఫ్ తో సంబంధ బాంధవ్యాలున్నాయని, అదే జైలు నుంచి విడుదలైన నక్సల్ ఖైదీ నాయుడు నాగార్జున రెడ్డి అప్పట్లో ఆరోపించాడు.

-శ్రీజ