Posted: 12/22/2011 10:10 AM IST

బాక్సైట్ నిక్షేపాల తవ్వకాల మీద కేంద్ర నిపుణల కమిటీ ప్రజాభిప్రాయ సేకరణ ప్రారంభించటంతో విశాఖపట్నం సర్క్యూట్ హౌస్ దగ్గర పరిస్థితి ఉద్రిక్తంగా తయారైంది.  కమిటీని గోబ్యాక్ అంటూ నినాదాలు చేస్తూ ఆందోళన చేసిన కొందరు సిపిఐ సిపిఎమ్ జనసత్తా కార్యకర్తలను అరెస్ట్ చేసారు.  ఫ్లెక్సీలతో నినాదాలతో ఆందోళన చేస్తుంటే అరెస్ట్ ల పర్వం ఇంకా కొనసాగుతూనేవుంది.  కమిటీ సభ్యులను రెండు రోజులుగా మన్యం ప్రాంతంలో అడ్డుకోవటంతో వారు ఏరియల్ సర్వేకి పూనుకున్నారు. 

అరకు వ్యాలీలోని సీతాపురం గ్రామస్తులను మహిళలతో సహా 60 మందిని అరెస్ట్ చేసారు.  వారి అరెస్ట్ అన్యాయమని, వారిని వెంటనే విడుదల చెయ్యాలని కార్యకర్తలు గిరిజిన సంఘాలు డిమాండ్ చెస్తున్నాయి.  వేలాది గిరజన కుటుంబాలు నిరాశ్రయులవుతారని, తవ్వకాల వలన అక్కడి పంటభూములు, జలాశయాలు కలుషితమైపోతాయని, కాఫీ తోటలు పూర్తిగా నాశనమైపోతాయని స్థానికుల ప్రతిఘటనకు వామపక్షాలు, గిరిజన సంఘాలు మద్దతు పలుకుతున్నాయి. 247 గ్రామాలు, 9312 కుటుంబాలు, 44000 మంది గిరిజనులకు నీడ లేకుండా చెయ్యటమే కాకుండా కాఫీ తోటల మీద ఆధారపడే 60000 కుటుంబాలకు నష్టం చేకూరుస్తుందని, 8000 ఎకరాల అటవీ ప్రాంతాన్ని ఎడారిగా మారుస్తుందని వామపక్షాలు నిరసన గళాలు ఎత్తాయి.  ఓపెన్ కాస్ట్ పద్ధతిలో తవ్వకాలు జరగటం వలన ధూళి వ్యాపించి, గిరిజనులకు శ్వాసకోస వ్యాధులు తలెత్తే అవకాశముందని సంఘాలు, పార్టీలు వ్యతిరేకిస్తున్నాయి. 

చింతపల్లి అడవుల్లో బాక్సైట్ నిక్షేపాలను తవ్వి తీయటంతో పాటు, ప్రభుత్వం అందరి స్థానికుల అభిప్రాయానికి వ్యతిరేకంగా ముందుకెళ్ళటానికి మరో కారణం, అరకు నుంచి మొదలై అడవులన్నీ మావోయిస్ట్ లకు స్థావరాలుగా ఉండటం.   తవ్వకాల కార్యకలాపాలు మొదలైతే మావోయిస్ట్ ల బెడద కూడా పోతుందని ప్రభుత్వం యోజన అంటూ రాజకీయ విశ్లేషకులు భావిస్తున్నారు.

-శ్రీజ