Posted: 11/30/2011 11:04 AM IST

     హైద్రాబాద్ నగరవాసుల సౌకర్యార్థం నిర్మించదలచుకున్న మెట్రో ప్రోజెక్ట్ అడుగడుగునా అవాంతరాలను ఎదుర్కుంటున్నా, రాష్ట్ర ప్రభుత్వం ప్రతిష్టాత్మకంగా తీసుకుని దాన్ని ఎలాగైనా పూర్త చెయ్యాలనే సంకల్పం చేసుకున్నట్టుగా కనపడుతోంది. మెట్రో నిర్మాణానికి కావలసిన భూమిని సేకరించటానికి ఒకపక్క నోటీసులు ఇస్తూ, మరో పక్క స్పష్టంగా ఉన్న చోట్లలో పనులు చేపడుతూ, సమస్యలను గుర్తించి వాటిని పరిష్కరించే దిశగా ప్రయత్నాలు జరుపుతూ, మియాపూర్ నుంచి అమీర్ పేట, నాగోల్ నుంచి మెట్టుగూడా వరకు జరగవలసిన మెట్రో ప్రోజెక్ట్ మొదటి విడత లో భాగంగా జనవరి నెలలో మొదటి మెట్రో స్తంభాన్ని నిలబెట్టాలని కాంట్రాక్టర్లు తొందరపడుతున్నారు. ఈ దిశలో హైద్రాబాద్ మెట్రో రైల్ లిమిటెడ్, (హెచ్ ఎమ్మార్), ఎల్ అండ్ టి ఇంజినీర్లు కష్టపడి పనిచేస్తున్నారు.

     ఢిల్లీలో మెట్రో విజయవంతమైంది. అదే దారిలో మొదలుపెట్టిన బెంగళూరు సిటీ కూడా సౌకర్యంతో పాటు అందాన్నీపెంచుకుంది. అలాగే మొదలుపెట్టిన ఆంధ్రప్రదేశ్ విషయంలోనే న్యాయపరమైన అడ్డంకులు వస్తూవచ్చాయి.    

     అంతా క్లియర్ అయిన తర్వాతనే పని మొదలు పెట్టాలంటే ఆలస్యం జరిగే అవకాశం ఉన్నందువలన, ఎక్కడైతే నిర్మాణం చేపట్టటానికి సమస్యలు ఎదురవటంలేదో ఆ ప్రాంతాల్లో చేసుకుంటూ పోతే సులభమవుతుందని అధికారులు భావిస్తూ ప్రణాళికాబద్ధంగా ముందుకెళ్తున్నారు. ఏది ఏమైనా 2014 కల్లా రాష్ట్రంలో ప్రగతిని చూపించుకోవలసిన అవసరం ప్రస్తుత ప్రభుత్వానికెంతైనా ఉంది. రాజకీయరంగంలో ఎదురైన సమస్యలతోనే ఇంతకాలం కొట్టుమిట్టాడుతూ వస్తున్న ప్రభుత్వానికి, కాస్త అలజడులు తగ్గి, ప్రభుత్వానికి పక్కలోబల్లెంలా ఉన్న వారందరూ ఆత్మరక్షణలో పడిన సందర్భంగా, ఎన్నికలలో చెప్పుకోవటానికి ప్రగతి కనిపించాలి, నిజంగా కూడా ఏదో ఒక దిశగా అభివృద్ధి కార్యకలాపాలను చేపట్టాలి కాబట్టి, వివిధ పథకాలు అమలులోకి వచ్చినట్టే మెట్రో రైలు కూడా వేగం పుంజుకుంటోంది.  

-శ్రీజ