Posted: 11/26/2011 03:38 PM IST

ప్రకటించిన విధంగానే నిన్నటి నుంచి కొత్త పాస్ పోర్ట్ సేవా కేంద్రాలు పని ప్రారంభించాయి. బేగం పేటలోని పాస్ పోర్ట్ సేవా కేంద్రాన్ని ప్రారంభించిన రాష్ట్ర ప్రధాన కార్యదర్శి పంకజ్ ద్వివేది, మారుతున్న కాలంలో ఆధునికి సాంకేతిక పరిఙానాన్ని ఉపయోగించుకుని పాస్ పోర్ట్ నమోదు, జారీ చేసే విధానాన్ని సులభతరం చేసినందుకు అభినందిస్తూ, ఇది అందరికీ చాలా ప్రయోజనకారియని ఆయన అన్నారు. అభ్యర్థులు తమకి కేటాయించిన సమయంలో వచ్చి పాస్ పోర్ట్ కోసం దరఖాస్తు చేసుకునే అవకాశం ఉండటం వలన సమయాన్ని వృధా అవకుండా ఉంటుందని ఆయన అన్నారు. ఈ కార్యక్రమంలో డిజిపి దినేష్ రెడ్డి, నగర కమిషనర్ ఏకె ఖాన్ పాల్గొన్నారు.

ఇంతకు ముందు పెద్ద పెద్ద క్యూలలో గంటల తరబడి వేచివుండాల్సి వచ్చేది. త్వరగా పని జరగటం కోసం, ఆరోజే పని జరగటం కోసం అభ్యర్థులు పాస్ పోర్ట్ కార్యాలయం తెరవక ముందు నుంచే బారులు తీర్చి నిలుచునేవారు. ఇప్పుడు వచ్చిన ఆధునిక సాంకేతిక పరిణామంతో వారు ముందుగానే సమయాన్ని పొంది ఆ సమయంలో కార్యాలయానికి వస్తే చాలు.

హైద్రాబాద్ లో బేగం పేట, టోలీ చౌకీ, అమీర్ పేట లో మూడు పాస్ పోర్ట్ సేవా కేంద్రాలు, ఇంకా రాష్ట్రంలో విజయవాడ, తిరుపతి నిజామాబాద్ లలో ఒక్కొక్కటి చొప్పున మొత్తం ఆరు పాస్ పోర్ట్ సేవా కేంద్రాలను ప్రారంభించటం జరిగిందని పాస్ పోర్ట్ కేంద్రాల జాయింట్ సెక్రటరీ ముకేశ్ కుమార్ పరదేశి అన్నారు.

శ్రీజ