భారీ ప్రమాదం నుంచి తప్పించుకున్న మోహన్ బాబు

Posted: 10/09/2014 06:25 PM IST

సినీ నటుడు, నిర్మాత డా. మోహన్ బాబుకు పెద్ద గండం గడిచిందనే చెప్పాలి. ఆయన ప్రయాణిస్తున్న కారు గురువారం భారీ ప్రమాదంకు గురయింది. తన కార్యాలయం నుంచి ఇంటికి బయల్దేరగా మార్గమద్యలో మాదాపూర్ దగ్గర ముందు ఉన్న కారును మోహన్ బాబు కారు ఢీ కొట్టిందట. ఈ ప్రమాదంలో సినీ నటుడి రేంజ్ రోవర్ కారు బాగా దెబ్బతిన్నట్లు తెలుస్తోంది. అయితే ఈ ప్రమాదంలో అదృష్ట వశాత్తు మోహన్ బాబుకు ఎలాంటి గాయాలు కాలేదు. ప్రమాదం నుంచి ఆయన తృటిలో తప్పించుకున్నారు.

ఈ విషయాన్ని మోహన్ బాబు కుటుంబం మీడియాకు వెల్లడించింది. ప్రస్తుతం ఆయన క్షేమంగా ఉన్నారని వెల్లడించారు. అభిమానులెవరూ ఆందోళన చెందవద్దన్నారు. ప్రమాదం ఎలా జరిగింది.., ఇందుకు గల కారణాలపై మాత్రం కుటంబీకులు వివరాలను వెల్లడించలేదు. త్వరలోనే దీనిపై మరిన్ని వివరాలు బయటకు వచ్చే అవకాశముంది. మొత్తం మీద ప్రమాదం నుంచి మోహన్ బాబు బయట పడటంతో అభిమానులు ఊపిరి పీల్చుకున్నారు. భగవంతుడు సాయి బాబానే బాబును కాపాడాడు అని అంతా అంటున్నారు. ఇవాళ గురువారం కావటంతో పాటు.., బాబు సాయి భక్తుడు అన్న విషయం అందరికి తెలిసిందే.

కార్తిక్