భగత్ సింగ్ సోదరి కన్నుమూత

Posted: 09/29/2014 05:10 PM IST

స్వాతంత్ర్య సమరయోధుడు, అమరవీరుడు ‘భగత్ సింగ్’ సోదరి ‘పర్ కాశ్ కౌర్’ ఇక లేరు. 96సంవత్సరాలున్న పర్ కాశ్ కౌర్ కెనడాలో కన్నుమూసినట్లు ఛండీగఢ్ లోని ఆమె అల్లుడు హర్బజన్ దింఘ్ దత్ వెల్లడించారు. టొరంటోలో కుటుంబ సభ్యులతో కలిసి  ఉంటున్న కౌర్ ఆదివారం రాత్రి తుదిశ్వాస విడిచిందన్నారు. భగత్ సింగ్ కుటుంబం ( తోడబుట్టిన వారు) లో చివరగా మిగిలింది పర్ కాష్ మాత్రమే. భగత్ 107వ జయంతి (సెప్టెంబర్ 27) జరిగిన మరుసటి రోజునే ఆయన సోదరి కన్నుమూయటం గమనార్హం.

భారత స్వాతంత్ర్యోద్యమంలో అతివాదుల్లో చెప్పదగ్గ పోరాట యోధుడు భగత్ సింగ్. పొమ్మంటే పోని వారిని తరిమి కొట్టడమే సరైన మార్గం అని విప్లవ పంధాలో స్వాతంత్ర్య ఉద్యమాన్ని నడిపాడు. 1928లో ఓ బ్రిటిష్ పోలిస్ అధికారిని కాల్చి చంపారు అనే నేరంపై భగత్ ను అప్పటి బ్రిటీష్ ప్రభుత్వం 1931 మార్చి 24న ఉరితీసింది. ఉరికంబం ఎక్కిన భగత్ ఏ జంకు లేకుండా.. ‘భారత్ మాతాకి జై’ అంటూ ప్రాణాలు వదిలాడు. ఆ స్వాతంత్ర్య స్పూర్తి ఇప్పటికీ దేశ ప్రజల్లో ఉంది.

కార్తిక్