108 సేవలన్నీ బంద్

Posted: 07/20/2013 08:10 PM IST

జిల్లాలో 108 వాహన సేవలన్నీ నిలిచిపోయాయి. దీంతో అనేక మంది క్షతగాత్రులు సకాలంలో ఆస్పత్రులకు చేరలేక ఇబ్బంది పడ్డారు. తమకు జీవీకే యాజమాన్యం సరైన జీతాలు ఇవ్వడం లేదని, సమస్యలు పరిష్కరించడం లేదని ఆరోపిస్తూ సిబ్బంది ఆందోళనకు దిగారు. కలెక్టర్ కార్యాలయం ఎదుట దీక్ష చేపట్టారు. తమ సమస్యలపై కొన్ని నెలలుగా జీవీకే ఈఎంఆర్ఐ యాజమాన్యానికి తెలియజేశామని, అలాగే వైద్య శాఖ ఉన్నతాధికారుల దృష్టికి తీసుకెళ్లినా ఎవరూ ఇంతవరకు స్పందించలేదన్నారు. రోజుకు ఎనిమిది పనిగంటలు కాగా అందరితో 12 గంటలు చేయిస్తున్నారని, విధి నిర్వహణలో ప్రమాదం జరిగితే యాజమాన్యం ఆదుకోవాలని, బెయిల్, కోర్టు ఖర్చులు ఇవ్వాలని వారు కోరారు. ప్రభుత్వం ప్రతి ఏటా వాహనాల నిర్వహణకు బడ్జెట్ పెంచుతున్నా.. వీరు మాత్రం తమ జీతాలు పెంచడం లేదని ఆరోపించారు. కనీస వేతనం రూ.15వేలు, ఎనిమిది గంటల పనిదినం అమలు చేయాలన్నారు. అదే విధంగా ఉద్యోగులపై వేధింపులు, అక్రమ బదిలీలు, సస్పెన్లన్లు ఆపాలని కోరారు. చట్టప్రకారం అన్ని సౌకర్యాలు కల్పిస్తూ ప్రభుత్వమే 108 సర్వీసులను నడపాలని తాము డిమాండ్ చేస్తున్నామని, వీటిని నెరవేర్చేవరకు ఆందోళన చేస్తామన్నారు.