పసుపు నీళ్లతో వేదిక ను శుద్దిచేసిన వైఎస్ఆర్ పార్టీ?

Posted: 04/30/2013 07:07 PM IST

ఇటీవల ఆంధ్ర విశ్వకళాపరిషత్‌ ఇంజనీరింగ్‌ కళాశాల మైదానంలో తెలుగుదేశం పార్టీ నిర్వహించిన వస్తున్నా మీకోసం ముగింపు సభ ద్వారా విశాఖ ప్రాంతం అపవిత్రం అయ్యిందంటూ వైఎస్‌ఆర్‌ కాంగ్రెస్‌ పార్టీ విద్యార్ధి సంఘం ప్రతినిధులు ఎయు మైదానం లో పుణ్యవచనం పేరిట పసుపు నీళ్ళను చల్లడం కనిపించింది. ఈ సందర్భంగా వారు మాట్లాడుతూ తొమ్మిది సంవత్సరాల పాలనలో చంద్రబాబు నాయుడు రాష్ట్రాన్ని అతలాకుతలం చేసాడని, యువతకు ఉపాధి లేకుండా చేసాడని, రైతాంగాన్ని ఏనాడో మరిచిపోయారని, కేవలం వ్యాపారాన్ని మాత్రమే చూసుకున్నారని, కనీసం పార్టీ క్యాడర్‌ ను కూడా విస్మరించిన ఘనుడు చంద్రబాబేనన్నారు. పార్టీని స్ధాపించిన ఎన్టీఆర్‌ నే పార్టీ నుంచి బయటకు పంపిన ఘనుడు రాష్ట్ర ప్రజలకేం చేస్తారని ప్రశ్నించారు. ఇలాంటి వారు నడిచిన ప్రాంతం అపవిత్రం కాకుండా పుణ్యావచనం చేస్తున్నామన్నారు. రాజకీయ పార్టీల అభిప్రాయాల తో పాటు, పార్టీల కార్యకర్తల ప్రవర్తనలు కూడా పరిస్ధితులను ప్రభావితం చేసేవిగా ఉంటున్నాయి. నగరంలోని రాజకీయ పార్టీలు నిర్వహించుకున్న బహిరంగ సభలు, సమావేశాలను నిరసిన్తు ధర్నాలు చేయడం, రాస్తారోకోలు నిర్వహించడం స్ధాయి నుంచి ప్రస్తుతం ఆయా సభా ప్రాంగణాల్లో పుణ్యాహవచనాలు చేయడం ఆరంభించారు. రాజకీయ దుమ్ము పోవాలంటే నోటి తో మాత్రమే సమాధానం చెపితే సరిపోదని, వారి తిరిగిన నేల కూడా అపవిత్రం అవుతోందని సాకుతో శుద్ధి చేయడం కూడా కనిపిస్తోంది.