చోడవరంలో ఊపందుకున్న రియల్ ఎస్టేట్?

Posted: 04/08/2013 09:57 PM IST

ఇటీవల కాలంలో రియల్ ఎస్టేట్ ఊపందుకోవడంతో ఎక్కడ కొద్ది జాగాఉంటే అక్కడ ప్లాట్లు వేసి విక్రయిస్తున్నారు. చోడవరం పంచాయతీతోపాటు పరిసర పంచాయతీల్లోని స్థలాల్లో ఇష్టారాజ్యంగా లేఅవుట్లు వెలుస్తున్నాయి. చోడవరం పరిసర ప్రాంతాల్లో లే అవుట్లు పుట్టగొడుగుల్లా పుట్టుకొస్తున్నాయి. ఎటువంటి అనుమతులు లేకుండానే పచ్చని పంట పొలాలను ఇష్టారాజ్యంగా లేఅవుట్లు వేసేస్తున్నా అధికారులు ప్రేక్షకపాత్ర పోషిస్తున్నారు.  ఇక వ్యవసాయభూములను కూడా ఎటువంటి అనుమతుల్లేకుండా రియల్ ఎస్టేట్లుగా మార్చేస్తున్నారు. పంటభూములను వ్యవ సాయేతర అవసరాలకు వినియోగించేటపుడు ప్రభుత్వానికి చెల్లించవలసిన నాలా పన్ను పూర్తిగా ఎగ్గొడుతున్నా, అధికార యంత్రాంగం మాత్రం ప్రేక్షకపాత్రకే పరిమితం అయ్యింది. చోడవరం పరిసర పంచాయతీల్లో ఇటు చోడవరం నుంచి అటు చీడికాడ వరకు వెలసిన లేఅవుట్లలో ఎక్కువ శాతం వ్యవసాయ పంటభూములే. కానీ వీటినుంచి ప్రభుత్వానికి వసూలు చెల్లించాల్సిన నాలా పన్ను మాత్రం ఎక్కడా వసూలైనదాఖలాలు లేవు. ఈ లేఅవుట్లకు ప్రభుత్వపరంగా ఎటువంటి అనుమతులు లేకపోవడం గమనార్హం. వాస్తవానికి లేఅవుట్ నిబంధనల ప్రకారం మధ్యలో రహదారులు వేసి, కొంతమేర స్థలాన్ని కమ్యూనిటీ అవసరాల మేరకు విడచిపెట్టి మిగిలిన స్థలంలో ప్లాట్లు వేసి ప్రభుత్వ అనుమతి పొందిన మీదట విక్రయించాలి. కానీ క్షేత్రస్థాయిలో ఇవేవీ అమలుకావడంలేదు. ఖాళీ స్థలం తీసుకుని మధ్యలో రోడ్డు వేసి అటూ ఇటూ ప్లాట్లు వేసి విక్రయిస్తున్నారు. ఇదే కాకుండా గతంలో వేరొకరికి విక్రయించిన స్థలాలనే, కొన్ని రోజుల తర్వాత మరొకరికి అమ్మేస్తున్న ఘటనలు ఎక్కువయ్యాయి. ఇటువంటి ఘటనలపై వివాదాలు రేగడం బాధితులు పోలీసులను ఆశ్రయిస్తుండడం ఎక్కువగా జరుగుతున్నాయి. చోడవరం ప్రాంతంలో చిన్నవీ పెద్దవీ కలిపి దాదాపుగా వంద వరకూ లేఅవుట్లు ఉన్నాయి. వీటిలో ఒకటి రెండు తప్ప మిగిలిన వాటికి అనుమతుల్లేకపోవడం గమనార్హం.