‘రవితేజ కాంప్లిమెంట్ మర్చిపోలేనిది’

Posted: 08/21/2015 06:17 PM IST

Raj tarun speaks about cinema chupista maava hit

తెలుగు చిత్ర పరిశ్రమలో అసిస్టెంట్ డైరెక్టర్ గా కెరీర్ ప్రారంభించిన రాజ్ తరుణ్.. ‘ఉయ్యాల జంపాల’ సినిమాతో వెండితెరకు హీరోగా పరిచయమయ్యాడు. బావ మరదలి ప్రేమకథతో తెరకెక్కిన ఆ చిత్రం ఘనవిజయం సాధించడంతో ఈ యువహీరోకి ఒక్కసారిగా క్రేజ్ వచ్చి పడింది. ఆ తర్వాత ఇతనికి బోలెడన్ని సినిమా ఆఫర్లు వచ్చినా.. సరైన కథ దొరకకపోవడంతో ఒప్పుకోలేదు. ఎన్నో కథలను విన్న అనంతరం ‘సినిమా చూపిస్త మావ’ చిత్రానికి గ్రీన్ సిగ్నల్ ఇచ్చేశాడు. ఈ చిత్రం ఆగస్టు 14వ తేదీన ప్రేక్షకుల ముందుకు రాగా.. అది అన్ని చోట్లా మంచి టాక్ సంపాదించి హిట్ దిశగా దూసుకెళుతోంది. కలెక్షన్లు కూడా అనుకున్నదానికంటే ఎక్కువగానే వస్తున్నాయి. దీంతో ఈ యువహీరో ఇమేజ్ అమాంతం పెరిగిపోయింది. మొదటి చిత్రంతో డీసెంట్ హిట్ కొట్టి, రెండో చిత్రంతో ఘనవిజయం సాధించి ఇండస్ట్రీ మొత్తాన్ని తనవైపు ఆకర్షించాడు రాజ్ తరుణ్.

ఈ రెండో చిత్రం మంచి విజయం సాధించడంతో రాజ్ తరుణ్ ఆనందంలో మునిగితేలుతున్నాడు. ఈ సందర్భంగానే ఇతగాడు మాట్లాడుతూ.. తాము ఎంతో కష్టపడి చేసిన ఈ సినిమా, ప్రేక్షకుల దగ్గర్నుంచి మంచి రెస్పాన్స్ రాబట్టుకోవడం హర్షనీయంగా వుందుంటూ పేర్కొన్నాడు. మొదట తాను హీరోగా చేసిన ఈ రెండో ప్రయత్నాన్ని ప్రేక్షకులు ఎలా తీసుకుంటారో అన్న భయం ఉండేదని, సినిమా హిట్ కొట్టడంతో కొత్త ఎనర్జీ వచ్చిందని రాజ్ తెలిపాడు. ముఖ్యంగా మాస్ మహారాజ్ రవితేజ అందించిన కాంప్లిమెంట్ మర్చిపోలేనని, సొంత కష్టాన్ని నమ్ముకొని వచ్చిన రవితేజ అంటే ఎప్పట్నుంచో మంచి గౌరవం ఉండేదని, అలాంటి వ్యక్తి నుంచి కాంప్లిమెంట్ రావడమంటే అది అదృష్టమని ఈ కుర్రహీరో తెలిపాడు. ప్రస్తుతం ఈ హీరో మూడు సినిమాలతో బిజీగా ఉన్నానని, అందులో ఒకటి సుకుమార్ నిర్మాతగా రూపొందుతోన్న ‘కుమారి 21F’ అని రాజ్ తరుణ్ స్పష్టం చేశాడు.