'నవ్వుల మాంత్రికుడు ' రమణా రెడ్డి !

Posted: 05/22/2013 04:24 PM IST

ఆరడుగుల పొడవు , అరంగుళం మందం , ఇవి రామణా రెడ్డి చుట్టు కొలతలు . అందరూ సన్నివేశాలలో హాస్యాన్ని పండిస్తే , ఆయన ఆయన చేసిన అన్ని పాత్రలకే హాస్యపు పూత పూసారు . కామెడీ విలన్ గా , తన మాట తీరు తో , చతురోక్తులతో , సందర్భోచితమైన నటన తో , డైలాగ్ ని ఏదో అప్పచెప్పినట్టు కాక , మన ముందే చాలా సహజంగా మాట్లాడుతున్నారా అన్న తీరు గా , హాస్యం పండించడానికి ప్రత్యేకించి ఏ హావ భావాలూ కాక , తన పాత్ర లోనే హాస్యాన్ని సహజంగా ఒలకబోసి , గొప్ప హాస్య నటుడిగా ఎప్పటికీ గుర్తుండిపోతారు , రమణా రెడ్డి .

శరీరాన్ని ఎటు పడితే అటు , రబ్బర్ లా తిప్పే మ్యానరిసం , నెల్లూరు యాసలో వినగానే నవ్వు ఒచ్చే విధంగా మాట్లాడటం , రమణా రెడ్డి గారి ప్రత్యేకత . ఈయన శరీర తీరుకి తగ్గట్టు , సూర్యాకాంతం వంటి భారీ పెర్సెన్యాలిటీ , తెరపై గయ్యాళి గా పేరుమోసిన నటీమణులకు , భయం తో వణికి పోయే పీల భర్త పాత్రల్లో రమణా రెడ్డి ఎన్నో విజయవంతమైన సినిమాల్లో చేసిన నటన , అందరినీ అమితంగా ఆకట్టుకుంది .

రమణా రెడ్డి గారి ముఖం లోనే , కళ్ళల్లోనే హాస్యం కనిపిస్తుంది . 'మాలపిల్ల' తో వెండితెరకు పరిచయం అయ్యారు ఈ నటులు . కాని తనకంటూ ప్రత్యేకమైన గుర్తింపును సంపాదించుకుంది మాత్రం , 'మిస్సమ్మ' వంటి చిత్రాల తోనే . నెల్లూరు లో స్యానిటరీ ఇన్స్పెక్టర్ గా ఉద్యోగ బాధ్యతలని నిర్వహిస్తోన్న రమణా రెడ్డి గారికి , సినిమాల పైనా , నటన పైనా మోజు పెరిగింది , చేస్తున్న ఉద్యోగం మానేసి మదరాసు చేరారు . ఎన్ని కష్టాలు , ఎదురు దెబ్బలు చుట్టుముట్టినా , తాను అనుకున్నది సాధించారు , నటుడిగా రంగ ప్రవేశం చేసారు , హాస్య నటుడిగా ఎదిగారు , హాస్య రసాన్ని పాత్రకు తగ్గట్టు పండించే విలక్షణ నటుడిగా వెలిగిపోయారు , తెలుగు చిత్ర సీమ ఉన్నంత కాలం ప్రేక్షకులకు గుర్తుండిపోతారు . ఎదుట ఎలాంటి నటులు ఉన్నా , తనదైన శైలిలో హాస్యాన్ని ఒలకబోయటం రమణా రెడ్డి గారి ప్రత్యేకత . ఈయన నటన 'గుండమ్మ కధ ' వంటి సినిమాల్లో తారాస్థాయిలో ఎలివేట్ అవుతుంది . తోటి హాస్య నటులు 'రేలంగి' వంటి వారితో ఆరోగ్యమైన పోటీ మధ్యలో నటించి తనదైన గుర్తింపును సంపాదించుకున్నారు .

రమణా రెడ్డి గారి పాత్రల తీరు తెన్నులు కూడా ఎంతో గమ్మత్తుగా ఉంటాయి . ప్రపంచంలో లేని సమస్యలను సృష్టించుకుని , ఆ సమస్యలతో కొట్టుమిట్టాడుతూ , ఇటువంటి తరహా సంఘటనలతో హాస్యాన్ని పండించడం , రమణా రెడ్డి గారి పాత్రల ప్రత్యేకత . మరి ఇలాంటి పాత్రలని పోషించగలిగింది , నటన శైలి నుండి హావ భావ తీరు వరకు , ఈ పాత్రలకు సరిగ్గా సరిపోయేటట్టు ఉండే రమణా రెడ్డి గారు . అందుకే ఈ నటుడికి నవ్వుల మాంత్రికుడు అన్న బిరుదు కూడా ఉంది , తెలుగు చిత్ర పరిశ్రమలో .

కామెడీ విలన్గా కూడా ఎన్నో సినిమాల్లో హాస్యం పండించారు రమణా రెడ్డి గారు . విలన్ కు పక్కనే ఉంటూ , గుంటనక్కలా సలహాలు అందించే పాత్రలు రమణా రెడ్డి గారి కరియర్ లో ఎన్నో . ఈయన నటుడిగా చేసిన తరువాతి తరం సినిమాల్లో కూడా , ఈయన పాత్రలను ప్రేరణగా తీసుకుని ఎన్నో కమీడీ విలన్ పాత్రలు రాయబడ్డాయి , రాయబడుతున్నాయి , ఎందరో నటులు , కామెడీ విలన్లుగా చిత్ర పరిశ్రమలో గుర్తింపు పొందారు , పొందుతున్నారు కూడా .

ఏదో చాన్స్ వచ్చింది కదా అని నటించడం కాక , ఒచ్చిన అవకాశాన్ని సద్వినియోగం చేసుకుని , తన కంటూ ప్రత్యెక పాత్రాలు , వాటి ద్వారా యెనలేని ప్రేక్షక అభిమానం , గుర్తింపు సంపాదించుకున్న నటుడు చిత్ర సీమకో 'ఆణిముత్యం' రమణా రెడ్డి గారు .