బాలనేరస్థుడి విడుదలను ఒప్పుకోను: ప్రియాంక చోప్రా

Posted: 12/23/2015 06:01 PM IST

బాలీవుడ్ నటి ప్రియాంకచోప్రా నిర్భయ కేసు బాల నేరస్తుడి విడుదలను అస్సలు ఒప్పుకోనని తెలిపింది. ప్రియాంక చోప్రా నటిస్తున్న తాజా చిత్రం జై గంగాజల్. ఈ సినిమా ట్రైలర్ లాంఛ్ కార్యక్రమం జరిగింది. ఈ కార్యక్రమంలో బాలనేరస్తుడి విడుదలపై మీడియా అడిగిన ప్రశ్నకు ప్రియాంక సమాధానమిస్తూ బాల నేరస్తుడి విడుదల సరైంది కాదు. అతడు చేసిన నేరం క్షమించరానిది. చట్టం ఈ ఘటనను ఏవిధంగా పరిగణించినప్పటికీ అతను చేసింది అతిక్రూరమైన క్షమించరానిదని ఉద్ఘాటించింది.

మూడేండ్ల క్రితం 2012 డిసెంబర్ 16న దేశవ్యాప్తంగా సంచలనం సృష్టించిన నిర్భయ కేసులో మూడేండ్ల జైలుశిక్ష పడిన బాల నేరస్థుడు విడుదలయిన విషయం తెలిసిందే. తిమార్పార్ పరివర్తన కేంద్రం నుంచి విడుదలైన అతడు ప్రస్తుతం ఒక స్వచ్ఛంద సంస్థ పర్యవేక్షణలో ఉన్నాడు. అయితే బయటి నుండి వస్తున్న ప్రజా స్పందనతో నిన్న జువైనల్ చట్టంలో మార్పులు తీసుకువచ్చింది. తీవ్రమైన నేరాలు చేసింది బాలలే అయినా వారికి పెద్దలతోపాటు శిక్ష విధించేలా చట్టంలో మార్పులు తీసుకురావడం జరిగింది.