టిఆర్ఎస్ లో చేరాలని పోలీసుల బెదిరింపులు: కిషన్ రెడ్డి

Posted: 12/14/2015 04:23 PM IST

బిజెపి తెలంగాణ రాష్ట్ర అధ్యక్షుడు కిషన్ రెడ్డి అధికార పార్టీ మీద విమర్శలు గుప్పించారు. గులాబీదళంలో చాలా మంది వేరే పార్టీల నాయకులు చేరుతున్నారు. అయితే తమ విధానాలు, అభివృద్ది చూసి, నచ్చి పార్టీలోకి వస్తున్నారని మంత్రి కేటీఆర్ ప్రకటించినా అది నిజం కాదని అంటున్నారు కిషన్ రెడ్డి. తెలంగాణలో వేరే పార్టీల నాయకులు టిఆర్ఎస్ లో చేరడానికి ఆ పార్టీ అన్ని ప్రయత్నాలు చేస్తోందని విమర్శించారు. ప్రతిపక్షంలో ఉన్న నాయకులను, నేతలను తమ పార్టీలోకి చేర్చుకోవడానికి టిఆర్ఎస్ రకరకాలుగా ప్రయత్నిస్తోందని అన్నారు. చివరకు పోలీసులు కూడా ఆ పార్టీకి మధ్యవర్తిత్వం నిర్వహిస్తున్నట్లు కిషన్ రెడ్డి ఆరోపించారు.

జిహెచ్ఎంసీ ఎన్నికల నేపథ్యంలో గత కొంత కాలంగా టిఆర్ఎస్ పార్టీలో భారీగా చేరికలు నడుస్తున్నాయి. తెలుగుదేశం, కాంగ్రెస్ పార్టీలకు చెందిన నాయకులు గులాబీ కండువా కప్పుకొని.. కారెక్కుతున్నారు. అయితే అలా చేరడానికి అధికార పార్టీ అధికార దుర్వినియోగానికి పాల్పడుతోందని కిషన్ రెడ్డి ఆరోపిస్తున్నారు. పోలీసులు మధ్యవర్తిత్వం చెయ్యడమే కాకుండా అక్కడక్కడ బెదిరింపులకు పాల్పడుతున్నారని మండిపడ్డారు. టిఆర్ఎస్ వ్యవహారంపై తమ పార్టీ అధ్యక్షుడు అమిత్ షాకు ఫిర్యాదు చెయ్యనున్నట్లు కూడా కిషన్ రెడ్డి వివరించారు.