ఆ ఎంపీలు కుట్ర చేస్తున్నారు : మోదీ

Posted: 09/11/2015 03:47 PM IST

Narendra modi controversial comments congress party india development schemes

ప్రతిపక్ష పార్టీలపై సున్నితంగా విమర్శలు గుప్పించే భారత ప్రధాని నరేంద్రమోదీ.. ఈసారి అందుకు భిన్నంగా తీవ్రస్థాయిలో మండిపడ్డారు. పార్లమెంట్ కార్యకలాపాలను అడ్డుకున్నందుకు కాంగ్రెస్ పార్టీపై అంతెత్తున ఎగిసిపడ్డారు. ఆ పార్టీ దేశాభివృద్ధిని అడ్డుకుంటోందని ఆయన అభిప్రాయపడ్డారు. 400 మంది ఎంపీలు దేశాన్ని అభివృద్ధి బాటలో తీసుకెళ్లాలని ప్రయత్నిస్తుంటే.. దానికి వ్యతిరేకంగా 40 మంది ఎంపీలు కుట్ర చేస్తున్నారంటూ ఆయన కాంగ్రెస్ పై పరోక్షంగా ఆరోపించారు.

పార్లమెంట్ సమావేశాల్లో అధికార బీజేపీ, కాంగ్రెస్ పార్టీల మధ్య వాదోపవాదనలు జరిగిన విషయం విదితమే! ముఖ్యంగా కాంగ్రెస్ పార్టీ ఎంపీలు లోక్ సభలో రచ్చరచ్చ చేయడంతో సమావేశాలు ఆందోళనకరంగా సాగాయి. ఈ అంశాన్ని పురష్కరించుకుని తాజాగా మోదీ గరం అయ్యారు. లోక్ సభలో తమ గొంతు నొక్కితే జనసభకు వెళతామని, అది పార్లమెంట్ దిగువసభ కంటే పెద్దదని ఆయన పేర్కొన్నారు. పార్లమెంటులో వారు వ్యవహరించిన తీరు చూసిన తర్వాత కొన్ని పార్టీలను ప్రజలను క్షమించరంటూ తన అభిప్రాయాన్ని వ్యక్తం చేశారు. అహంకారంతో ప్రజాస్వామ్య విలువల్ని తుంగలో తొక్కుతున్నారని మోదీ మండిపడ్డారు.

ఛండీగడ్ లో పర్యటిస్తున్న సందర్భంగా ఏర్పాటు చేసిన బహిరంగసభలో.. మోదీ పై విధంగా కాంగ్రెస్ పార్టీపై పరోక్షంగా ఘాటు విమర్శలు చేశారు. ఈ నేపథ్యంలోనే ఆయన అక్కడ పలు అభివృద్ధి కార్యక్రమాలను ప్రారంభించారు. మాజీ సైనికులకు వన్ ర్యాంక్ వన్ పెన్షన్ అమలు చేసిన ఘనత తమదేనంటూ మోడీ వెల్లడించారు. మరి.. మోదీ చేసిన (పరోక్ష) ఘాటు కామెంట్లపై కాంగ్రెస్ ఎలా స్పందిస్తుందో?