కేసీఆర్-బాబుల మ్యాచ్ ఫిక్సింగ్

Posted: 07/07/2015 01:00 PM IST

తెలంగాణ ముఖ్యమంత్రి కేసీఆర్, ఆంధ్రప్రదేశ్ సీఎం చంద్రబాబు నాయుడు మధ్య విభేదాలు ఏ స్థాయిలో వున్నాయో ప్రత్యేకంగా చెప్పుకోవాల్సిన అవసరం లేదు. రాష్ట్ర విభజన జరిగిన కొన్నాళ్లవరకు మాటలతూటాలతో ఒకరిపై మరొకరు విరుచుకుపడిన ఆ సీఎంలు.. ఇప్పుడు ‘ఓటుకు నోటు’, ‘ఫోన్ ట్యాపింగ్’ కేసుల్లో కోర్టు వ్యవహారాలదాకా వెళ్లారు. వీరిద్దరు ఇంతలా పోట్లాడుకుంటుంటే.. తెలంగాణ శాసనమండలిలో విపక్ష నేత షబ్బీర్ అలీ మాత్రం అందరినీ ఆశ్చర్యంలో ముంచెత్తే సరైన పాయింట్ ని లేవనెత్తారు.

తెలుగురాష్ట్రాల ముఖ్యమంత్రుల మధ్య మ్యాచ్ ఫిక్సింగ్ నడుస్తోందని ఆరోపించిన షబ్బీర్ ఆలీ.. దానికి ఓ మంచి ఉదాహరణను కూడా పేర్కొన్నారు. కేసీఆర్ కు సంబంధించిన పత్రిక అయిన ‘నమస్తే తెలంగాణ’లో చంద్రబాబుకు చెందిన ‘హెరిటేజ్’ సంస్థ యాడ్ వచ్చిందని.. మరే ఇతర పత్రికల్లో కూడా ఇంతవరకు ఆ సంస్థ యాడ్ ఇవ్వలేదని చెప్పారు. దీన్ని బట్టి చూస్తుంటే.. ఇద్దరు మంత్రుల మధ్య ఎటువంటి సంబంధాలు వున్నాయో అర్థమవుతున్నాయని ఆయన అన్నారు. కేవలం రాజకీయ ప్రయోజనాల కోసమే ఇద్దరు సీఎంలు ప్రజలను రెచ్చగొడుతున్నారని మండిపడ్డ ఆయన.. వారి మధ్య ఎటువంటి వైరుధ్యాలు లేవని తన అభిప్రాయాన్ని వెల్లడించారు.

ఏదేమైనా.. షబ్బీర్ అలీ లేవనెత్తిన ఈ ‘యాడ్’ అంశం ఇప్పుడు అందరినీ ఆలోచింపజేస్తోంది. ఒకవేళ ఆ ఇద్దరు సీఎంల మధ్య స్నేహబంధమే వుంటే.. ఇంతగా రాద్ధాంతం ఎందుకు సృష్టిస్తున్నారు? అనే ప్రశ్నలు తలెత్తుతున్నాయి. పోనీ.. ఇద్దరి మధ్య ఎటువంటి బంధం లేకపోతే.. బాబు ఎందుకు తన సంస్థ యాడ్ ని కేసీఆర్ కు సంబంధించిన పత్రికకు ఇచ్చారు? అని మరో ప్రశ్న. ఈ ప్రశ్నలకు సమాధానం లభించాలంటే.. ఆ ఇద్దరు సీఎంలే క్లారిటీ ఇవ్వాల్సి వుంటుంది.