మళ్లీ తుపాకీ పడతా : రేవంత్ రెడ్డి

Posted: 02/28/2015 03:40 PM IST

2011లో కరీంనగర్ లో జరిగిన రణభేరి సభకు రేవంత్ రెడ్డి తుపాకీ వెంటబెట్టుకున్న విషయం అందరికీ గుర్తుండే వుంటుంది. ఆనాడు ఆయనలా తనతోపాటు తుపాకీ తీసుకెళ్లడంతో పెద్ద దుమారమే రేగింది. ఉస్మానియా విద్యార్థులపై రేవంత్ తుపాకీ గురిపెట్టాడని కూడా ఆయనపై ఆరోపణలు వచ్చాయి. అప్పట్లో ఆ వ్యవహారం పెద్ద రచ్చరచ్చ జరిగింది. అయితే.. తాను మళ్లీ ఇప్పుడు తుపాకీ పడతానంటూ రేవంత్ మరోసారి బాంబు పేల్చాడు.

ఇటీవలే టీఆర్ఎస్ నేతలు రేవంత్ రెడ్డిపై సంచలన విమర్శలు చేశారు. ఆయన్ను కుక్కలతో పోల్చుతూ వ్యంగ్యంగా వ్యాఖ్యానించారు. దీంతో తీవ్ర ఆగ్రహానికి గురైన ఆయన.. తనను కుక్కలతో పోల్చడంపై తనదైన రీతిలో వారికి సమాధానం చెప్పారు. ప్రజల కోసం పోరు సాగించే క్రమంలో తాను శునకవిశ్వాసం ప్రదర్శిస్తానంటూ టీఆర్ఎస్ నేతలకు చెంపపెట్టు సమాధానమిచ్చారు. ఈ నేపథ్యంలో మళ్లీ తుపాకీ పడతానంటూ ఆయన అన్నారు.

కరీంనగర్ జిల్లా సిరిసిల్లలో జరిగిన నియోజకవర్గ స్థాయి సమావేశంలో రేవంత్ రెడ్డి మాట్లాడుతూ.. తెలంగాణలో టీడీపీ కార్యకర్తలను కాపాడుకునేందుకు అవసరమైతే మరోసారి తుపాకీ పడతానని స్పష్టం చేశారు. 2009లో ఎన్నికల్లో టీడీపీ మద్దతుతోనే కేటీఆర్ గెలిచారని గుర్తుచేసిన ఆయన.. ఇప్పుడు టీడీపీని ఖాళీ చేస్తామని వ్యాఖ్యానించడం సబబు కాదని అన్నారు.