ఏపీని ఊడ్చేది పవనేనా ?

Posted: 12/12/2013 05:38 PM IST

పవర్ స్టార్ పవన్ కళ్యాణ్ - ఈ పేరు చెప్పగానే కొందరిలో ఎక్కడలేని వైబ్రేషన్. ఆయన అంటే కొందరికి పిచ్చి. ఆయన్ను హీరో కన్నా వ్యక్తిగా చాలా మంది అభిమానిస్తారు. ఆయన మంచి గుణానికి అందరు పడిపోవాల్సిందే. ఆపదలో ఉన్నాననంటే నేనున్నానని ధైర్యం చెప్పే పవన్ అంటే ఆయన అభిమానులు పడి చస్తారు. ఇటీవలి కాలంలో ఆయన అభిమానులు ‘పవనిజం ’ పేరుతో చేసే హంగామా అంతా ఇంతా కాదు. టాలీవుడ్‌లో దాదాపు అందరూ పవన్ నామజపం చేస్తున్నారు.

మరి అలాంటి పవన్ గురించి ఇప్పుడెందుకంటే... ఇటీవల ఢిల్లీలో జరిగిన ఎన్నికల్లో అవినీతికి వ్యతిరేకంగా ఓటువేసి దేశ రాజకీయాల్లో పెను మార్పుకు పునాది వేసిన ‘ఆమ్ ఆద్మీ పార్టీ ’ లోకి పవన్ కళ్యాణ్ చేరబోతున్నాడనే వార్తలు జోరందుకున్నాయి. ఆ మధ్య పవన్ టీడీపీలోకి పవన్‌ వెళ్తారంటూ ఆ మధ్య జరిగిన ప్రచారం అందరికీ తెల్సిందే. ఆ తర్వాత అదంతా ఉత్తుత్తి ప్రచారమేనని తేలిపోయింది. ఢిల్లీ ఎన్నికల్లో అధికార పార్టీని ‘చీపురు ’ తో ఊడ్చేసిన ‘ఆమ్ ఆద్మీ పార్టీ ’ ఆంధ్రప్రదేశ్ లో విస్తరించి దానికి అధ్యక్షుడిగా పెడితే బాగుంటుందనే అభిప్రాయం వ్యక్తం చేస్తున్నారు. ఈ వార్తల పై పవన్‌ మాత్రం ఇప్పటిదాకా స్పందించ లేదు. గతంలో వచ్చిన వార్తల పై ఆయన కాకుండా నాగబాబు స్పందించాడు.

ఇప్పుడు కూడా పవన్ స్పందిస్తాడనే నమ్మకమూ లేదు. గతంలో తన అన్నయ్య పార్టీకి ‘యువ రాజ్యం ’ అధ్యక్షుడిగా ఉండి యూత్ ఫాలోయింగ్ ని ఆ పార్టీకి సంపాదించి పెట్టిన పవన్ ఆ తరువాత రాజకీయాలకు దూరంగా ఉంటున్నాడు. అన్న పార్టీని కాంగ్రెస్ లో విలీనం చేశాడనే కోపమో, ఒకవేళ రాజకీయాల్లోకి వస్తే తనకు కూడా అన్నయ్య లాంటి పరిస్థితి వస్తుందని భావిస్తున్నాడో కానీ పవన్‌ చుట్టూ రాజకీయాలకు సంబంధించిన గాసిప్స్‌ పూటకొకటి పుడుతూనే ఉన్నాయి. కారణం ఆయనకున్న ఇమేజ్. పాపులారిటీ. ఎప్పుడు స్పీచ్ ఇచ్చినా దేశం గురించి, అవినీతి గురించి, దేశానికి ఏదో ఒకటి చేయాలన్న తపనతో మాట్లాడే పవన్ వాటిని అమల్లో పెట్టడంలో మాత్రం వెనకడుగు వేస్తున్నాడు.

మాటల్లో ఆదర్శ వంతంగా నిలిచే పవన్ ఒక నాయకుడిగా ఎదగడానికి కావాల్సిన లక్షణాలు ఉన్నాయా లేవా అనేది పక్కన పెడితే.... ఈయన రాజకీయ ప్రవేశం పై పుంకాను పుంకాలుగా వార్తలు మాత్రం వస్తున్నాయి. పవన్ కి రాజకీయాల్లోకి వచ్చి సేవ చేయడం కంటే తెర వెనక సేవచేయడమే ఎక్కువ ఇష్టం అని తెలిసివారు అంటుంటారు. కానీ ఆయన అభిమానులు, ఆయన గురించి తెలిసివారు మాత్రం రాజకీయాల్లోకి రావాలని కోరుకుంటున్నారు. వారందరి కోరిక మేరకు రాజకీయాల్లోకి వస్తాడో ? లేక ఈ గాసిప్స్ ను వింటూ గమ్మున కూర్చుంటాడో ?