అబ్బే డిసెంబర్ లో కాదు... జనవరిలో...

Posted: 11/30/2013 10:22 AM IST

తెలంగాణ ఇవ్వడం అంటే దోసె వేయడం అంతా ఈజీ కాదు... నెలకు ముప్పై రోజులే ఉంటాయి కానీ నెలంటే ముప్పై రోజులు మాత్రమే కాదు... డిసెంబర్ 31 తరువాత తెలంగాణలో ఏం జరుగుతుంది అని అడిగితే... జనవరి ఒకటి వస్తుంది... ఏంటి ఇవన్నీ మాటలు ఎక్కడో విన్నట్లు ఉన్నాయనుకుంటున్నారా ? అవును తెలంగాణ విషయంలో కాంగ్రెస్ పెద్దలు మాట్లాడిన మాటలు ఇవి. నిన్న మొన్నటి వరకు డిసెంబర్ లోనే తెలంగాణ బిల్లు పెడతామని బీరాలు పలికిన పెద్దలు ఇప్పుడు మాట మార్చే పరిస్థితి స్పష్టంగా కనిపిస్తుంది.

కాంగ్రెస్ కోర్ కమిటీ తాజా భేటీలో తెలంగాణ బిల్లు పై భిన్నాభిప్రాయాలు వ్యక్తం అయ్యాయి. ఒకరు ఎడ్డెం అంటే ఇంకొకరు తెడ్డెం అన్నారు. తీరా సమయం దగ్గర పడటంతో ‘అబ్బే డిసెంబర్ లో అనుకున్నాం కానీ.. సాధ్యపడటం లేదు ’ జనవరిలో ప్రత్యేకంగా పార్లమెంటును ఏర్పరచి బిల్లు పెడతామని కొత్త మాట చెబుతున్నారు. శీతాకాలం అంటే, జనవరిలో కూడా వుంటుంది కదా.. అప్పుడు చూస్కుందాంలే అని కొందరు అధినేత్రికి సూచించినట్లు సమాచారం.

అంతా అయిపోతుందని ఒక నాయకుడు, ఎలా అవుతుందంటూ మరో నాయకుడు అధినేత్రి ముందే వాదులాటకు దిగినంత పని చేయడంతో సభ్యుల మధ్య ఏకాభిప్రాయం రాకపోవడంతో మరింత లోతుగా చర్చించే బాధ్యతను జీవోఎంపై పెట్టారని, రాబోయే కేబినెట్‌లో కూలంకుషంగా చర్చించి నిర్ణయం తీసుకోవాలని అభిప్రాయానికి వచ్చారని సమాచారం.

ఓ వైపు ఎన్నికలు సమీపిస్తున్నాయి... పార్టీ పరిస్థితి కాస్తంత మెరుగ్గా ఉండాలంటే కాస్తంత టైంపాస్ చేయాలి. జనవరి వరకు పరిస్థితులు కొన్ని చక్కబడి కలిసొస్తాయన్నది కాంగ్రెస్‌ లాజిక్‌. వారి లాజిక్‌ కూడా చాలాసార్లు వర్కవుట్‌ అయ్యింది. ఇప్పుడూ అవ్వుద్దేమో ? గతంలో లాగ  తెలంగాణ అంశాన్ని సాగదీయడానికి చేస్తోన్న ప్లాన్ లో భాగమే అంటున్నారు తెలంగాణ వాదులు.