కేసిఆర్ ఏక్ నిరంజన్

Posted: 11/11/2013 07:34 PM IST

కాంగ్రెస్ పార్టీలో టిఆర్ఎస్ విలీనం ఉండదని ఆ పార్టీ అధ్యక్షుడు కె.చంద్రశేఖర రావు పార్టీ శ్రేణులకు చెప్పారు. పార్టీ కోసమే పని చేయమని పార్టీ నాయకులను ఆయన కోరారు. వచ్చే ఎన్నికలలో ఒంటరిగానే పోటీ చేస్తామని స్పష్టం చేశారు.

 

దీంతో కాంగ్రెస్-టిఆర్ఎస్ విలీనంపై కొనసాగుతున్న చర్చకు తెరపడినట్లుగా భావించాలి. తెలంగాణ ప్రత్యేక రాష్ట్రం ఇస్తే తమ పార్టీని కాంగ్రెస్లో విలీనం చేస్తామని గతంలో కెసిఆర్ చెప్పారు. టిఆర్ఎస్ - కాంగ్రెస్ విలీనంపై గత కొంత కాలంగా చర్చ జరుగుతోంది. ఈ నేపధ్యంలో విలీనం లేదని కెసిఆర్ పార్టీ శ్రేణులకు చెప్పారు.

 

తెలంగాణ కాంగ్రెస్ నేతలపై టీఆర్ఎస్ మరోసారి మండిపడింది. టీ.కాంగ్రెస్ నేతలు ఎందుకు సంబరాలు చేసుకుంటున్నారని టీఆర్ఎస్ నేత నాయిని నర్సింహరెడ్డి ప్రశ్నించారు. రాష్ట్ర విభజన ఏర్పాటుపై మాట్లాడిన ఆయన తెలంగాణ కాంగ్రెస్ నేతల వైఖరిపై మండిపడ్డారు. తమ త్యాగాల వల్లే తెలంగాణ ఏర్పాటు సాధ్యపడిందని ఆయన తెలిపారు. హైదరాబాద్ నగరంపై కాంగ్రెస్ ఏమైనా షరతులు విధిస్తే తీవ్రపరిణామాలుంటాయన్నారు.

 

 

ఒకవేళ ఏమైనా కిరికిరి చేస్తే 1969 కంటే మించిన ఉద్యమాన్ని చేపడతామని నాయిని హెచ్చరించారు. హైదరాబాద్‌పై సీమాంధ్రుల పెత్తనం ఉంటే తెలంగాణ ఏర్పడినా ప్రయోజనం ఉండదని, ఆంక్షలు లేని తెలంగాణ రాష్ట్రంతోనే ఈ ప్రాంత ప్రజల బతుకులు బాగుపడతాయని టీఆర్‌ఎస్ విమర్శించింది.