రాహుల్ క్షమాపణ కోరాలి కానీ తమాషాగా మాట్లాడటం కాదు

Posted: 09/29/2013 02:59 PM IST

ప్రభుత్వం చేసిన ఆర్డినెన్స్ సరైనది కాదని, దాన్ని చించిపారెయ్యాలని, రాజ్యాంగ విరుద్ధమని, రాహుల్ గాంధీ ఘాటుగా మాట్లాడినదానిమీద వ్యాఖ్యానిస్తూ తెలుగుదేశం పార్టీ అధినేత చంద్రబాబు నాయుడు రాహుల్ గాంధీ అలా వ్యాఖ్యలు చెయ్యటం కాదు నేరచరిత గల వాళ్ళు ప్రజాప్రతినిధులుగా చెలామణీ అయ్యే అటువంటి ఆర్డినెన్స్ చేసిన కాంగ్రెస్ పార్టీ తరఫున జాతికి క్షమాపణ చెప్పాలన్నారు. 

మన్మోహన్ సింగ్ కి ప్రధాని పదవిలో ఉండే అర్హత ఇక లేదన్నారు చంద్రబాబు.   ఈ సంక్షోభానికంతా కారణం ఆయనే కనుక బాధ్యతను విస్మరించకుండా నడుచుకోవలన్నారాయన.  జాతీయ ఎన్నికల పరిశీలకుల దగ్గరున్న సమాచారం ప్రకారం నేరచరితగల వాళ్ళు గతంలో 10 శాతం ఉంటే అది ఇప్పుడు 30 శాతానికి పెరిగిందని, వైకాప అధ్యక్షుడు జగన్ లాంటివాళ్ళు చాలామంది పుట్టుకొచ్చారని, వాళ్ళందరినీ రాజకీయాలలోకి రానివ్వటం సరికాదని చంద్రబాబు అన్నారు

కాంగ్రెస్ పార్టీకి యువరాజు హోదాలో ఉన్న రాహుల్ గాంధీ అదాటున నిద్రలేచి నేనొప్పుకోను, ఆ కాగితాలను చించెయ్యండనటం కాదు ఆ అర్డినెన్స్ సోనియా గాంధీకి తెలియకుండానే పాస్ చెయ్యటం జరిగిందా అని ప్రశ్నించారు.  పైగా ఇది కేవలం నా వ్యక్తిగత అభిప్రాయమని అంటారా.  ఇదేనా బాధ్యయుతమైన హోదాలో జాతీయ పార్టీలో పనిచేస్తూ యువ నాయకుడిగా మాట్లాడాల్సిన మాట అంటూ చంద్రబాబు విమర్శించారు.  చిన్నపిల్లవాడిలా మాట్లాడటం సరి కాదన్నారాయన. 

ఆర్డినెన్స్ విషయంలో మన్మోహన్ సింగ్, సోనియా గాంధీల ప్రమేయాన్ని తప్పుపట్టిన చంద్రబాబు ట్విట్టర్ లో కూడా దీని గురించి రాస్తూ, రాహుల్ గాంధీ ప్రధానమంత్రిని మాటిమాటికీ కించపరుస్తూ మాట్లాడుతున్నారు.  ప్రభుత్వం చేసిన ఆర్డినెన్స్ ని నాన్సెన్స్ అని రాహుల్ గాంధీ అన్నందుకు అది నిజం కాకపోతే ప్రధానమంత్రి రాజీనామా చెయ్యాల్సిందేనన్నారాయన. 

-శ్రీజ