స్వరం పెంచిన కిషన్ రెడ్డి?

Posted: 09/16/2013 10:44 AM IST

వెయ్యి మజ్లిస్‌ పార్టీలు అడ్డుపడ్డా... తెలంగాణ రాష్ట్ర ఏర్పాటును అడ్డుకోలేరని భారతీయ జనతా పార్టీ రాష్ట్ర అధ్యక్షుడు జి.కిషన్‌రెడ్డి అన్నారు. ఆ పార్టీ రాష్ట్ర కార్యాలయంలో నల్లగొండ జిల్లా భువనగిరి, ఆలేరు నియోజకవర్గాల నుండి చామల భాస్క ర్‌రెడ్డి, భాస్కర్‌ల నాయకత్వంలో పలువురు బిజెపిలో చేరిన సందర్భంగా ఆయన కార్యకర్తలను ఉద్దేశించి ప్రసంగించారు. తెలంగాణ వస్తే బిజెపి బలపడుతుందని, ముస్లిం మైనారిటీ లను తరిమికొడతారని మజ్లిస్‌ పార్టీ విష ప్రచారం చేస్తోందన్నారు. అయితే తెలంగాణ రావడం ఖాయమని, అలాగే బిజెపి కూడా బలపడడం ఖాయమని, ముస్లిం మైనారిటీలను రాష్ట్రం నుండి గెంటివేస్తారని చెబుతున్న మాటల్లో ఎటువంటి నిజం లేదన్నారు. ప్రస్తుత రాజకీయ అనిశ్చితి తొలగాలంటే దేశంలో బిజెపి బలపడాల్సిన అవసరం ఉందన్నారు. నరేంద్రమోడీ నాయకత్వంలో పార్టీ 2014లో అధికారంలోకి రావడం ఖాయమని జోస్యం చెప్పారు. వాజ్‌పేయ్‌ ప్రధానిగా ఉన్న కాలంలో దేశం సుభిక్షంగా ఉందని అన్నారు. ఎన్నికలకు ముందు తెలంగాణ కోసం లేఖలు ఇచ్చిన పార్టీలన్నీ నేడు యూ టర్న్‌ తీసుకుని ప్రజలను మోసం చేశాయని అన్నారు. ముఖ్యమంత్రి కిరణ్‌కుమార్‌రెడ్డి, పిసిసి అధ్యక్షుడు బొత్స సత్యనారాయణలు కూడా తెలంగాణను అడ్డుకునే ప్రయత్నం చేస్తున్నారని మండిపడ్డారు.