ఏపి ఎన్జీవోల కార్యాచరణ

Posted: 09/11/2013 05:23 PM IST

ఏపి ఎన్జీవో భవన్ లో మాట్లాడిన ఆ సంఘ అధ్యక్షుడు అశోక్ బాబు, తమ భవిష్యత్ కార్యాచరణను వెల్లడి చేస్తూ, 16 న హైకోర్టు తీర్పు వెలివడవచ్చునని, తీర్పు ఎలా ఉన్నాసరే దానితో నిమిత్తం లేకుండా సమ్మె మాత్రం కొనసాగే అవకాశమే ఎక్కువగా కనిపిస్తోందని అన్నారు.  రాష్ట్రాన్ని యథాతథంగా ఉంచాలన్న కోరికతోనే సమ్మె సాగుతుందని ఆయన అన్నారు. 

గ్రామ స్థాయిలో చైతన్య సభలు 14 వ తేదీ వరకు జరుగుతాయని, ఇంతవరకు విజయవంతంగా సాగాయని, 15 న రాష్ట్ర స్థాయిలో ఎపిఎన్జీవో కార్యవర్గ సమావేశం, 16న ఉద్యోగ సంఘాలు, ఇతర సంఘాలతో కలిసి చర్చలు కొనసాగిస్తామని అశోక్ బాబు చెప్పారు. 

ఒత్తిడి మంత్రాలలో, కేంద్ర మంత్రులు ప్రభుత్వం మీద ఎలా ఒత్తిడి తేవాలి, తెలంగాణా బిల్లు అసెంబ్లీకి వస్తే ఎమ్మెల్యేల మీద ఎలాంటి ఒత్తిడి తేవాలన్న విషయాలమీద చర్చలు జరుపుతున్నామని అశోక్ బాబు అన్నారు.  రేపటి కార్యక్రమంలో సీమాంధ్రలోని కేంద్ర ప్రభుత్వ కార్యాలయాల దిగ్బంధం ఉందని కూడా ఆయన తెలియజేసారు.

అయితే, ఉద్యోగులే ప్రభుత్వాన్ని నడుపుతారా అనే విమర్శలు కూడా వినిపిస్తున్నాయి.  విద్య, ఉద్యోగ, వ్యాపారాలకు అతీతంగా నాయకత్వం వహించి ప్రజలచేత ఎన్నుకోబడి ప్రజాప్రాతినిధ్యం చేసేవారిని కాదని, ఉద్యోగులు తమ విధులు బహిష్కరించి ప్రభుత్వ కార్యకలాపాల్లో తలదూర్చటం ఎంతవరకు సమంజసం అని పలువురు విశ్లేషకులు ప్రశ్నిస్తున్నారు.  సరైన నాయకత్వం లేనప్పుడు ఉద్యోగుల చేత పనులు చేయించుకోవటానికి సామాన్య ప్రజలు ఎన్ని కష్టాలననుభవిస్తుంటారో ఎవరూ మర్చిపోరని కూడా వారు అన్నారు. కానీ, ఉద్యమాలలో ఎవరో ఒకరు ముందడుగు వెయ్యటం కూడా అవసరమేనన్న అభిప్రాయాన్ని కూడా కొందరు వ్యక్తపరచారు.

ఎపిఎన్జీవోల ప్రజాప్రయోజన వ్యాజ్యం మీద 16 కి హైకోర్టు తీర్పువస్తుందని దాన్నిబట్టి తదుపరి కార్యాచరణ ఉంటుందని అశోక్ బాబు చెప్పారు.  . 

-శ్రీజ