పేదలకు కేంద్రం ఎన్నికల ఎర

Posted: 09/07/2013 09:35 AM IST

ఎన్నికలు సమీపిస్తున్నాయంటే చాలు మళ్ళీ అధికారంలోకి రావడానికి కేంద్ర, రాష్ట్ర ప్రభుత్వాలు పేదలకు ఎన్నికల తాయిలాలు ప్రకటించి బుట్టలో వేసుకుంటాయి. ముఖ్యంగా పేద ప్రజలను, గ్రామాల్లో ఉన్న వారిని ఆకర్షించేందుకు ఎంతైనా సిద్ధపడతాయి. ఇప్పటికే కొన్ని రాష్ట్రాల్లో టీవీలు, లాప్ టాప్ లు  లాంటివి ఇస్తుంటే ఇప్పుడు యూపీఏ ప్రభుత్వం దేశవ్యాప్తంగా ఉన్న గ్రామాల్లో ఉన్న వారికి సెల్ ఫోన్లు, 11, 12 తరగతులు చదువుతున్న వారికి పీసీ ట్యాబ్ లు ఇచ్చేందుకు ఓ పథకాన్ని రూపొందించేందుకు ప్రణాళికలు రూపొందించుతుంది. ఇప్పటికే పట్టుబట్టి ఆహారభద్రత బిల్లును ప్రవేశపెట్టి తన పంతం నెగ్గించుకున్న యూపీఏ ఇప్పుడు పేదలను, గ్రామాల్లో ఉన్న ప్రజలను, యువతకు గాలం వేస్తుంది. వచ్చే ఎన్నికల కంటే ముందే ఈ విధాన్ని ప్రవేశపెట్టేందుకు తీవ్రంగా ప్రయత్నిస్తుంది. ఈ మేరకు టెలికామ్ విభాగంలో అత్యున్నత నిర్ణాయక వ్యవస్థయిన టెలికామ్ కమిషన్‌కు ఒక నోట్‌ను  పంపింది. ఇది టెలికామ్ కమిషన్ ఆమోదం పొందితే కేబినెట్‌కు వెళ్తుంది. అక్కడ ఆమోదిస్తే... 2014 మార్చి నుంచి అమల్లోకి వచ్చే అవకాశముందని ఢిల్లీ వర్గాలు అంటున్నాయి.

ఈ పథకం అమల్లోకి వస్తే  గ్రామాల్లో నివసిస్తున్న 2.5 కోట్ల మందికి మొబైల్ ఫోన్లను, ప్రభుత్వ స్కూళ్లలో 11, 12 తరగతులు చదువుతున్న 90 లక్షల మంది విద్యార్థులకు ట్యాబ్లెట్ పీసీలను అందివ్వనుంది. ఈ పథకం కోసం 10 వేల కోట్లను ఖర్చు చేసేందుకు కూడా ప్రణాళికను రూపొందించారు. మొబైల్ ఫోన్లకు రెండేళ్ళ పాటు రీఛార్జ్ లు, ట్యాబ్లెట్ పీసీలో సిమ్, 500 ఎంబీ వరకు ఇంటర్ నెట్, రూ. 75 టాక్ టైమ్, 75 ఎస్సెమ్మెస్ లు, ఉచితంగా అందజేస్తారు. పథకాన్ని మొదలు పెట్టేది 2014 మార్చిలోనే అయి నా... ఫోన్ల కేటాయింపు పూర్తి చేయడానికి మాత్రం ఆరేళ్లు పడుతుంది. దీనివల్ల ప్రభుత్వంపై రూ.4,850 కోట్ల భారం పడుతుందని సమాచారం. ఈ ఎన్నికల తాయిలాలు యూపీఏకు ఉన్న మచ్చల్ని తొలగించి అధికారాన్ని కట్టబెడతాయో లేదో చూడాలి.